Afmælishaustþing SSA verður haldið í Egilsbúð í Neskaupstað dagana 17.–18. september 2026.

Sambandið fagnar 60 ára afmæli á árinu og setur afmælið svip sinn á þingið. Meðal dagskrárliða verður fjallað um 60 ára sögu SSA, skattspor Austurlands og ímynd landshlutans, auk hefðbundins málefnastarfs þingsins. Á hátíðarkvöldverði verða menningarverðlaun SSA jafnframt afhent og heiðursgestur sambandsins kynntur.

Haustþing SSA er stærsti árlegi viðburður sambandsins. Þar koma saman kjörnir fulltrúar sveitarfélaganna til umræðu og málefnastarfs um helstu hagsmunamál Austurlands. Þingið er mikilvægur vettvangur samráðs og sameiginlegrar stefnumótunar sveitarfélaganna.

Á þinginu er unnið að ályktun haustþings þar sem helstu áherslur sveitarfélaganna eru dregnar saman og skýr skilaboð send stjórnvöldum um helstu hagsmuna- og baráttumál landshlutans.

Haustþing SSA er fulltrúafundur. Til þingsins eru boðaðir aðalmenn í sveitarstjórnum á starfssvæði SSA, varamenn þeirra og aðrir boðsgestir.