Signý Ormarsdóttir hlýtur menningarverðlaun SSA
Signý Ormarsdóttir hlaut menningarverðlaun Sambands sveitarfélaga á Austurlandi (SSA) árið 2026. Verðlaunin voru afhent á hátíðarkvöldverði afmælishaustþings SSA í Egilsbúð í Neskaupstað í gærkvöldi. Signý lauk á árinu nær aldarfjórðungsstarfi í þágu menningarlífs Austurlands en hún tók við starfi menningarfulltrúa Austurlands árið 2002, fyrst allra til að gegna slíku starfi fyrir heilan landshluta á Íslandi.
Ragnar Sigurðsson, formaður SSA, afhenti verðlaunin og sagði Signýju hafa unnið að uppbyggingu, þróun og eflingu menningarstarfs á Austurlandi allar götur frá árinu 2002. Það hefði verið samdóma álit stjórnar SSA að við starfslok hennar væri rétt og viðeigandi að heiðra framlag hennar.
Þegar Signý tók við starfi menningarfulltrúa var Austurland brautryðjandi í menningarmálum. Hér varð til fyrsta sjálfstæða menningarráð landshlutanna og í kjölfarið var gerður sérstakur menningarsamningur við ríkið. Ragnar sagði Signýju því að mörgu leyti hafa fetað ótroðnar slóðir.
„Með tilkomu Signýjar má líka segja að menningarlífið á Austurlandi hafi eignast talsmann. Menningarmál urðu í auknum mæli að sjálfstæðum og sýnilegum málaflokki, með rödd innan stjórnkerfisins og manneskju sem gat fylgt málum eftir.“
Tengdi fólk og hugmyndir
Signý er kennari að mennt, fatahönnuður og starfandi listamaður og sagði Ragnar hana hafa staðið með annan fótinn í heimi skapandi fólks og hinn innan stjórnkerfisins. Hún hefði litið á sig sem tengilið og hreyfiafl, leitt fólk saman, aðstoðað við þróun hugmynda og hjálpað til við að gera þær að veruleika.
„Hún hefur sérstakt lag á að sjá tengingar milli fólks, koma saman ólíkum karakterum og sjá fyrir sér að ef þetta fólk væri sett saman gæti eitthvað áhugavert gerst.“
Stundum hefði aðferðin einfaldlega verið að bjóða fólki í mat. Þar hefði fólki verið stefnt saman, hugmyndum kastað fram og tengingar myndaðar.
„Með öðrum orðum: Signý byggði ekki bara upp tengslanet. Hún bauð tengslanetinu í mat,“ sagði Ragnar.
Fjárfest í fólkinu
Signý hefur um árabil talað fyrir því að menning sé hluti af samfélags- og byggðaþróun en ekki viðbót sem sinna megi þegar öðru sé lokið. Hún hefur jafnframt lagt áherslu á að mikilvægasta fjárfestingin sé í fólkinu sjálfu – listafólki, grasrótinni, unga fólkinu og þeim sem bera hugmyndirnar.
Á síðari árum hefur barnamenning verið henni sérstaklega hugleikin og BRAS, menningarhátíð barna og ungmenna á Austurlandi, mikið hjartans mál.
Ragnar sagði Signýju hafa stutt, hvatt og leiðbeint ótal einstaklingum í gegnum árin og hjálpað hugmyndum að komast á flug.
„Signý hefur verið einn af klettunum í þessari uppbyggingu. Hún er manneskjan sem kippir í spotta, tengir fólk saman, hvetur og opnar dyr.“
Signý hyggst nú gefa eigin listsköpun meira rými á ný eftir nær aldarfjórðung í þjónustu menningarlífs Austurlands.
SSA óskar Signýju hjartanlega til hamingju með menningarverðlaunin og þakkar henni fyrir ómetanlegt framlag til menningarlífs Austurlands í nær aldarfjórðung.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
