Gunnar Jónsson heiðursgestur SSA 2026
Gunnar Jónsson á Egilsstöðum var útnefndur heiðursgestur Sambands sveitarfélaga á Austurlandi (SSA) árið 2026 á hátíðarkvöldverði afmælishaustþings sambandsins í Egilsbúð í gærkvöldi. Gunnar hefur um langt árabil tekið virkan þátt í uppbyggingu samfélagsins á Héraði og látið til sín taka í fjölmörgum sameiginlegum hagsmunamálum Austurlands.
Ragnar Sigurðsson, formaður SSA, kynnti heiðursgestinn og sagði ekki hægt að ræða Gunnar án þess að ræða Egilsstaði 1. Ætt hans hefði byggt Egilsstaði í fimm kynslóðir og Gunnar sjálfur væri borinn og barnfæddur þar og hefði búið þar nær alla ævi.
Hann ólst upp við búskap, stundaði nám við Menntaskólann á Akureyri og hélt síðan til Edinborgar í landbúnaðarnám. Þar kynntist hann Vigdísi, eiginkonu sinni, og komu þau síðar heim til Egilsstaða og tóku þátt í búskapnum með foreldrum Gunnars.
Gunnar hefur sjálfur lýst sér sem „óhjákvæmilegum fylgifiski uppbyggingarinnar í þorpinu“. Ragnar sagði það skemmtilega hógværa lýsingu á manni sem hefði í raun tekið mjög virkan þátt í þeirri uppbyggingu.
Gunnar sat um langt árabil í sveitarstjórn og var formaður bæjarráðs. Hann kom meðal annars að sameiningarmálum sveitarfélaga, uppbyggingu Dyngju og Hitaveitu Egilsstaða og Fella. Þá lét hann til sín taka á vettvangi SSA og Austurbrúar og barðist þar meðal annars fyrir bættum samgöngum og öðrum sameiginlegum hagsmunum Austurlands.
Sagði skoðun sína hreint út
Ragnar vitnaði í fyrrum samstarfsmann Gunnars sem lýsti honum sem ósérhlífnum, duglegum og afar einörðum þegar kæmi að því sem hann teldi samfélaginu til góða.
„Það þurfti aldrei að velkjast í vafa um hver hans afstaða var til málanna. Hann sagði sína skoðun alltaf hreint út og það er ómetanlegt í öllu samstarfi.“
Ragnar sagði þá sem setið hefðu með Gunnari á fundum líklega kannast við lýsinguna. Hann hefði sterkar skoðanir, gaman af rökræðum og ekki síður þegar einhver væri honum ósammála.
„Og undir öllu þessu er bóndinn á Egilsstöðum. Maður sem hefur horft á þéttbýlið vaxa í kringum jörðina sína og tekið sjálfur þátt í að byggja samfélagið upp.“
SSA þakkar Gunnari fyrir framlag hans til samfélagsins á Héraði og Austurlands alls og óskar honum hjartanlega til hamingju með útnefninguna sem heiðursgestur SSA 2026.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
