Stóra tækifærið í alþjóðlegu flugi um Austurland
Mikil tækifæri felast í frekari uppbyggingu Egilsstaðaflugvallar, bæði fyrir ferðaþjónustu og útflutning. Á fjölmennri ráðstefnu komu fram skýr skilaboð um mikilvægi sterkra flugtenginga og markvissrar uppbyggingar innviða.
Tækifæri Egilsstaðaflugvallar rædd á fjölmennri ráðstefnu
Austurland á mikla möguleika sem alþjóðleg fluggátt í ferðaþjónustu og í tengslum við öflugan útflutning á svæðinu en stóra verkefnið er að jafna árstíðasveifluna. Þetta kom fram á ráðstefnu um Egilsstaðaflugvöll sem haldin var í Valaskjálf í dag en hátt í 100 manns sóttu ráðstefnuna m.a. fulltrúar stjórnvalda, flugfélaga og -valla, ferðaþjónustu og atvinnulífs auk sveitarstjórnarfólks á Austurlandi. Sigmar Vilhjálmsson athafnamaður stýrði ráðstefnunni og brýndi fundarfólk til aðgerða.
„Eitt af viðfangsefnum dagsins eru tækifæri í millilandaflugi í tengslum við ferðaþjónustu en jafnframt möguleikar þegar kemur að vöruflutningum, hlutverki vallarins sem varaflugvallar og mikilvægi hans fyrir samgöngukerfi landsins í heild. Þetta eru allt þættir sem tengjast því beint hvernig við nýtum innviði landsins á skilvirkan og framsýnan hátt,“ sagði Hanna Katrín Friðriksson, atvinnuvegaráðherra í opnunarávarpi sínu. Hún ræddi mikilvægi stuðnings við flugþróunarverkefni á Egilsstaða- og Akureyrarvelli í gegnum Flugþróunarsjóð sem hún sagði lykilstoð í uppbyggingu flugsamgangna en 100 milljónum hefur verið veitt aukalega til sjóðsins. Þá ræddi ráðherra framtíðaráherslur í ferðaþjónustu og stuðning við hana en í dag var tilkynnt um stuðning við uppbyggingarverkefni í gegnum Framkvæmdasjóð ferðamannastaða. Af þeim átján verkefnum sem hlutu styrki eru sjö á Austurlandi.
Getum dreift álagi og skapað betri upplifun
Sigrún Björk Jakobsdóttir, framkvæmdastjóri Isavia, fór yfir hlutverk Egilsstaðaflugvallar í flugvallakerfi landsins. Ræddi hún uppbyggingu og stækkun á flugvellinum sem er framundan í nýrri samgönguáætlun stjórnvalda. Í tengslum við ferðaþjónustu nefndi hún mikilvægi Flugþróunarsjóðs og röksemdir fyrir uppbyggingu vallarins sem gátt inn í landið til að dreifa ferðamönnum betur um landið. Sagði hún sóknarfæri felast í miklum áhuga ferðamanna á að koma aftur. „Með sterkum innviðum, skýrri sýn og réttum samstarfsaðilum getum við dreift álagi, aukið verðmæti og skapað betri upplifun,“ sagði Sigrún.
Möguleikarnir liggja í betri tengingu við Keflavík
Mikilvægi Egilsstaðaflugvallar og tækifærin til framtíðar var inntak erindis Boga Nils Bogasonar, forstjóra Icelandair. Bogi ræddi stöðu Icelandair og möguleika í alþjóðaflugi sem hann taldi liggja í gengum betri tengingu landsbyggðarinnar við alþjóðaflugvöllinn í Keflavík. Sagði hann slíkar tengingar sem væru til viðbótar við annað innanlandsflug vera öflug skref í átt að beinu flugi um Akureyri og Egilsstaði og hvatti til samtals um að þróa þessar leiðir.
Bættar flugsamgöngur styðja við vöxt svæðisins
Sigríður Dögg Guðmundsdóttir, forstöðumaður útflutnings og fjárfestinga hjá Íslandsstofu, lagði áherslu á öflugar tengingar inn á svæðið fyrir viðskiptalíf og ferðaþjónustu. Austurland hefði nú þegar gríðarlega sterka stöðu í útflutningi og auknar flugsamgöngur gætu stutt við næstu vaxtarskref þar. Samstarf Íslandsstofu og Austfirðinga væri mikið í tengslum við uppbyggingu ferðaþjónustu á svæðinu en hún hefur mikilvæga stöðu í umræðu um atvinnustefnu stjórnvalda. Þá ræddi hún einnig samstarfið í öðrum verkefnum svo sem að kynna Austurland sem tökustað fyrir kvikmyndir og fjárfestingarkost.
„Gullni hringurinn nær ekki hingað“
Yfirskrift erindis Bárðar Arnar Gunnarssonar, framkvæmdastjóra Svartatinds – Lava Center og Fontana á Laugarvatni, var: „Gullni hringurinn nær ekki hingað“. Bárður ræddi áhrif árstíðarsveiflu í ferðaþjónustu og nauðsyn þess að fá aukið fjármagn til innviðafjárfestinga. Beindi hann þeirri spurningu til stjórnvalda hvort þau gætu lækkað þröskulda sem stæðu í vegi fyrir uppbyggingu í ferðaþjónustu allt árið um kring, t.d. með fjármögnunarsjóðum.
Bárður lagði líka áherslu á mikilvægi þess að hanna upplifun gesta og tók sem dæmi Norðurljósaferðir þar sem tryggja þyrfti betri upplifun í smáu sem stóru. Hann ræddi möguleika sem fælust í endurkomu erlendra gesta, hæglætisferðamennsku og að tryggja sjálfbærni í ferðaþjónustu sem grunns og að horfa til gervigreindar og hvernig Austurland birtist þar.
„Grípum tækifærin til uppbyggingar“
Berglind Harpa Svavarsdóttir, formaður stjórnar Austurbrúar og Sambands sveitarfélaga á Austurlandi, hvatti í lokin fundarmenn til að leggjast á árarnar til að styrkja stöðu flugvallarins. Minnti hún á mikilvægi vallarins, ekki aðeins í tengslum við ferðaþjónustu og útflutning, heldur einnig í flugstefnu Íslands sem öryggisinnviði og í tengslum við varnamál. „Grípum tækifærin til uppbyggingar hans. Saman verður eitthvað til,“ sagði hún.
Efling Egilsstaðaflugvallar
Ráðstefnan var hluti af verkefni á vegum Austurbrúar sem miðar að eflingu Egilsstaðaflugvallar og aukinni nýtingu hans. Verkefnið er eitt af áhersluverkefnum Sóknaráætlunar Austurlands, þar sem unnið er markvisst að því að styrkja innviði, bæta tengingar og styðja við atvinnuþróun í landshlutanum í samræmi við sameiginlega framtíðarsýn svæðisins eins og henni er lýst í Svæðisskipulagi Austurlands 2022 – 2044.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
