Ný skýrsla Þórodds Bjarnasonar, prófessors í félagsfræði við Háskóla Íslands, um samfélagsleg áhrif millilandaflugs á Norður- og Austurlandi er nú komin út og aðgengileg á vef Austurbrúar. Skýrslan var kynnt á rafrænum fundi þann 8. maí á vegum Markaðsstofu Norðurlands í samstarfi við SSNE og Austurbrú.

Í rannsókninni er fjallað um þróun, umfang og áhrif millilandaflugs um Akureyrarflugvöll og hvaða áhrif bættar flugsamgöngur hafa á samfélag og atvinnulíf í landshlutunum. Verkefnið hlaut stuðning frá Sóknaráætlun Norðurlands eystra og Sóknaráætlun Austurlands.

Í skýrslunni er sérstaklega bent á að aðgengi að millilandaflugi skipti miklu máli fyrir búsetugæði og samkeppnishæfni landsbyggðarinnar. Niðurstöðurnar eru því einnig áhugaverðar fyrir Austurland þar sem lengi hefur verið lögð áhersla á mikilvægi góðra flugsamgangna og þróun Egilsstaðaflugvallar sem alþjóðaflugvallar. Í svæðisskipulagi Austurlands kemur meðal annars fram að reglulegt millilandaflug um Egilsstaðaflugvöll geti styrkt ferðaþjónustu, verslun og aðra þjónustu í landshlutanum auk þess að skapa ný sóknarfæri fyrir útflutning ferskra afurða.

Helstu niðurstöður rannsóknarinnar benda til þess að bættar flugsamgöngur hafi margvísleg jákvæð samfélagsleg áhrif, meðal annars aukna framleiðni, meiri viðskipti, aukna búsetuánægju og sterkari byggðafestu. Þá kemur fram að núverandi skipulag millilandaflugs á Íslandi hafi skapað ákveðinn ójöfnuð milli landshluta þar sem íbúar utan höfuðborgarsvæðisins ferðast almennt minna til útlanda en íbúar nærri Keflavíkurflugvelli.

Rannsóknin sýnir jafnframt að millilandaflug um Akureyrarflugvöll hafi veruleg áhrif á ferðavenjur íbúa á Norður- og Austurlandi og dragi úr þeim mun sem annars er á ferðatíðni landsmanna eftir búsetu.

Á kynningarfundinum fór Þóroddur yfir helstu niðurstöður rannsóknarinnar og að því loknu fóru fram umræður og fyrirspurnir þátttakenda. Arnheiður Jóhannsdóttir, framkvæmdastjóri Markaðsstofu Norðurlands, stýrði fundinum.

Skýrslan Samfélagsleg áhrif millilandaflugs á Norður- og Austurlandi er aðgengileg á vef Austurbrúar.