Fjölbreyttari störf en margir gera sér grein fyrir
Páll Baldursson ræðir um Starfamessu Austurlands og mikilvægi þess að kynna ungu fólki störf og tækifæri í heimabyggð.
Hlusta á þáttAð sýna ungu fólki tækifærin á Austurlandi
Páll Baldursson, verkefnastjóri hjá Austurbrú, er gestur nýjasta þáttar Austurland hlaðvarps. Þar ræðir hann um Starfamessu Austurlands 2026 sem fram fer í Íþróttahúsinu í Neskaupstað 24. september næstkomandi og er ætlað að kynna ungu fólki fjölbreytt störf og menntunarleiðir á Austurlandi.
Markmið Starfamessunnar er að tengja saman nemendur, atvinnulíf og menntastofnanir og gefa ungu fólki tækifæri til að kynnast þeim störfum sem eru unnin í heimabyggð. Gestir verða nemendur í 9. og 10. bekk grunnskóla auk nemenda á fyrsta og öðru ári í framhaldsskóla víðs vegar að af Austurlandi.
Í þættinum segir Páll að eitt af því sem kom mest á óvart á fyrstu Starfamessunni árið 2024 hafi verið hversu fjölbreytt atvinnulífið á Austurlandi reyndist vera. Þótt landshlutinn sé ekki fjölmennur séu þar starfandi fyrirtæki og stofnanir sem krefjist margvíslegrar þekkingar, tækni og sérhæfingar.
„Það er svo fjölbreytt flóra starfa innan fyrirtækjanna sjálfra,“ segir Páll og bendir á að margir geri sér ekki grein fyrir þeim möguleikum sem felast í atvinnulífinu á Austurlandi.
„Opnar dyr sem áður voru síður sýnilegar“
Samtalið tekur einnig óvænta beygju þegar þeir Páll og hlaðvarpsþáttastjórnandinn Jón Knútur rifja upp eigin náms- og starfsval á tíunda áratug síðustu aldar. Báðir lærðu sagnfræði við Háskóla Íslands og segjast hafa gengið út frá því að háskólamenntun myndi leiða þá burt af Austurlandi. Raunin varð þó önnur.
Páll sneri aftur heim eftir nám, starfaði meðal annars í Landsbankanum og síðar sem sveitarstjóri Breiðdalshrepps í rúm átta ár. Hann segir reynsluna hafa kennt sér mikilvægi mannlegra samskipta og þjónustu við samfélagið.
Að hans mati er Starfamessan leið til að opna dyr sem áður voru síður sýnilegar. Með því að gefa nemendum kost á að hitta fólk úr ólíkum starfsgreinum, spyrja spurninga og mynda tengsl megi auðvelda þeim að sjá framtíðarmöguleika á svæðinu.
Starfamessa Austurlands verður haldin í Neskaupstað 24. september. Fyrirtækjum, stofnunum og öðrum atvinnurekendum á Austurlandi stendur til boða að taka þátt og kynna þau störf sem unnin eru í starfsemi þeirra. Skráning stendur yfir á austurbru.is.
Hlusta á þátt
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
