Út er komin skýrslan Menningarhús í landsbyggðunum – stefnudrög og skilgreiningar. Skýrslan er unnin á vegum Austurbrúar í samstarfi við landshlutasamtök sveitarfélaga á landsbyggðinni og er hluti af aðgerð B9 í stefnumótandi byggðaáætlun.

Markmið verkefnisins er að skapa skýran og sameiginlegan ramma fyrir starfsemi menningarhúsa í landsbyggðunum, stuðla að samræmdri þróun þeirra og styrkja rekstrargrundvöll til framtíðar.

Í skýrslunni er staða menningarhúsa um landið kortlögð og fjallað um hlutverk þeirra, starfsemi, rekstrarform og fjármögnun. Niðurstöðurnar byggja meðal annars á yfirliti yfir menningarhús í landsbyggðunum, viðhorfskönnun meðal fólks sem tengist menningarmálum, samanburði við stöðu mála í nálægum löndum og samstarfi fulltrúa landshlutasamtakanna.

Greiningin sýnir mikla fjölbreytni meðal menningarhúsa, bæði hvað varðar eðli þeirra og hlutverk. Þau eiga þó sameiginlegt að vera mikilvægir vettvangar menningar, lista og samfélagsþátttöku. Í skýrslunni er jafnframt bent á mikilvægi þeirra fyrir byggðaþróun og efnahagslega fjölbreytni, meðal annars með tengingum við ferðaþjónustu og skapandi greinar.

Ein af meginniðurstöðum verkefnisins er að þörf sé á skýrari og samræmdari stefnu um menningarhús í landsbyggðunum. Skýrari skilgreiningar á hlutverkum, rekstrarformum og framtíðarsýn geti styrkt stöðu húsanna sem burðarása í menningarlífi, en jafnframt sé samstarf ríkis, sveitarfélaga og grasrótar lykilatriði.

Skýrslan inniheldur einnig stefnudrög um menningarhús og menningarmiðstöðvar auk ítarlegs yfirlits og gagna um menningarhús um land allt.

Skýrslan Menningarhús í landsbyggðunum – stefnudrög og skilgreiningar er aðgengileg á vef Austurbrúar.