Mannréttindi eru aldrei sjálfgefin
Jódís Skúladóttir, talskona Hinsegin Austurlands, ræðir um Regnbogahátíð Austurlands, mikilvægi sýnileika og stöðu mannréttinda í nýjasta þætti Austurlands hlaðvarps.
Hlusta á þáttNýr þáttur: Hinsegin fólk á að eiga skjól á heimaslóðum
Jódís Skúladóttir, talskona Hinsegin Austurlands, er gestur í nýjasta þætti Austurlands hlaðvarps. Rætt er um Regnbogahátíð Austurlands, starf Hinsegin Austurlands og stöðu og réttindi hinsegin fólks, ekki síst á landsbyggðinni.
Regnbogahátíð Austurlands hófst á Borgarfirði eystra 25. júlí og stendur yfir í þrjár vikur með viðburðum víða um fjórðunginn. Jódís segir þessa dreifðu nálgun meðvitaða. Frá stofnun Hinsegin Austurlands árið 2019 hafi áhersla verið lögð á að félagið nái til alls Austurlands og mæti fólki þar sem það er statt.
Í þættinum ræðir Jódís meðal annars um mikilvægi þess að hinsegin fólk geti fundið samfélag, stuðning og athvarf á sínum heimaslóðum. Hún segir sérstaklega mikilvægt að ná til ungs fólks sem hefur ekki endilega tök á að sækja viðburði eða þjónustu annars staðar á landinu.
„Við viljum að hinsegin fólk á öllum aldri, af öllum kynjum, fatlað og ófatlað og hvar sem það býr, geti átt sér skjól og athvarf og samfélag á sínum heimaslóðum,“ segir Jódís í þættinum.
Austurland geti verið leiðandi
Þá er rætt um breytt viðhorf til hinsegin fólks og það bakslag sem Jódís segist finna fyrir í réttindabaráttunni, meðal annars í harðari orðræðu á samfélagsmiðlum. Hún leggur áherslu á að mannréttindi séu áunnin og að stöðugt þurfi að standa vörð um þau.
Jódís segir jafnframt margt hafa breyst til hins betra og að staða ungs hinsegin fólks sé að mörgu leyti önnur en þegar hún sjálf var ung. Fræðsla, sýnileiki og stuðningur samfélagsins skipti þar miklu máli.
Í lok þáttar er rætt um Regnbogahátíðina og þá framtíðarsýn að Austurland láti ekki nægja að fylgja öðrum í mannréttindamálum heldur geti sjálft verið leiðandi.
Nýjasta þátt Austurlands hlaðvarps má nálgast á helstu hlaðvarpsveitum.
Hlusta á þátt
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
