Byggt upp af samfélaginu á Borgarfirði eystri
Olgeir Pétursson, hlaupastjóri Dyrfjallahlaupsins, ræðir um hvernig eitt stærsta utanvegahlaup landsins varð til á Borgarfirði eystri, sjálfboðaliðastarfið sem heldur því gangandi og samfélagið sem stendur á bak við viðburðinn.
Hlusta á þátt
Dyrfjallahlaupið er meira en bara hlaup
Olgeir Pétursson, hlaupastjóri Dyrfjallahlaupsins, er gestur nýjasta þáttar Austurland hlaðvarps. Þar ræðir hann um uppruna og þróun hlaupsins sem hefur á fáum árum fest sig í sessi sem eitt stærsta og virtasta utanvegahlaup landsins.
Dyrfjallahlaupið var fyrst haldið árið 2017 og upphaflega var hlaupið um Stórurð en árið 2020 var leiðin færð yfir á Víknaslóðir til að bæta aðgengi og öryggi þátttakenda. Síðar bættist við 50 kílómetra leið og í dag eru þrjár vegalengdir í boði; 12, 24 og rúmlega 50 kílómetrar.
Í þættinum segir Olgeir að markmiðið hafi frá upphafi verið stærra en að halda einfaldlega utanvegahlaup.
„Fyrst og fremst snýst þetta um að styrkja bæjarfélagið og virkja samfélagið í kringum viðburð,“ segir hann og líkir hlutverki hlaupsins að sumu leyti við Bræðsluna, sem einnig varð til út frá samfélagslegum forsendum.
Á hverju ári koma um 40 til 50 sjálfboðaliðar að framkvæmd hlaupsins, þar á meðal íbúar, fjölskyldur, björgunarsveitafólk og aðrir velunnarar viðburðarins. Að sögn Olgeirs er þessi samfélagsandi einn helsti styrkur hlaupsins.
Athygli út fyrir landsteinana
Dyrfjallahlaupið hefur vaxið jafnt og þétt á undanförnum árum og er nú orðið fastur liður í íslenska utanvegahlaupadagatalinu. Í ár verður hlaupið haldið í tíunda sinn og meðal þátttakenda verður sænski ofurhlauparinn Tove Alexandersson sem er meðal fremstu utanvegahlaupara heims.
Þá verður hlaupið í fyrsta sinn sýnt í beinni útsendingu á Vísi með aðstoð dróna og myndatökuliðs sem mun fylgja hlaupurum um hluta leiðarinnar.
Olgeir segir þó að þrátt fyrir aukna athygli og vaxandi vinsældir sé meginmarkmiðið enn hið sama og í upphafi; að skapa jákvæða upplifun fyrir þátttakendur og byggja upp hefð sem styrki samfélagið á Borgarfirði eystri til framtíðar.
„Við erum ekki bara að gera þetta fyrir okkur sjálf heldur líka fyrir næstu tíu, tuttugu og þrjátíu árin,“ segir hann.
Hlusta á þátt
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
