Starfamessa Austurlands verður haldin í Íþróttahúsinu í Neskaupstað 24. september næstkomandi. Þar koma saman austfirsk ungmenni, atvinnulíf og menntastofnanir með það að markmiði að kynna fjölbreytt störf og starfsleiðir á Austurlandi.

Gestir Starfamessunnar verða nemendur í 9. og 10. bekk grunnskóla á Austurlandi ásamt nemendum á fyrsta og öðru ári framhaldsskóla. Fyrirtæki, stofnanir og aðrir atvinnurekendur á Austurlandi eru nú hvattir til að skrá sig til þátttöku.

Áherslan á Starfamessunni er ekki á hefðbundna fyrirtækjakynningu heldur störfin sjálf. Þátttakendur eru hvattir til að sýna ungmennunum hvaða störf eru unnin innan fyrirtækisins eða stofnunarinnar, í hverju þau felast og hvaða menntun, þekkingu og færni þarf til að sinna þeim.

Markmiðið er þannig að opna augu ungs fólks fyrir fjölbreytileika austfirsks atvinnulífs og störfum sem það vissi jafnvel ekki að væru unnin í heimabyggð. Um leið gefst atvinnurekendum tækifæri til að kynna framtíðarstarfsfólki sínu þau tækifæri sem kunna að bíða þess á Austurlandi.

Starfamessa Austurlands var fyrst haldin á Egilsstöðum árið 2024 og sóttu hana um 400 nemendur frá Múlaþingi, Fjarðabyggð og Vopnafjarðarhreppi. Viðburðurinn vakti mikla ánægju meðal nemenda, kennara og sýnenda og verður nú endurtekinn í Neskaupstað.

Þátttaka fyrirtækja og stofnana er þeim að kostnaðarlausu og fá þau aðstöðu til að setja upp sýningarbás. Skráning er hafin og fer fram með því að hafa samband við Pál Baldursson hjá Austurbrú.

Starfamessan er samstarfsverkefni sveitarfélaganna á Austurlandi og Austurbrúar og liður í náms- og starfsráðgjöf skólanna í landshlutanum. Meginmarkmiðið er að tengja betur saman ungt fólk og atvinnulíf og sýna ungmennum að fjölbreytt tækifæri til náms, starfa og framtíðar eru fyrir hendi á Austurlandi.

• Nánari upplýsingar og skráning