Frá tölvuskjánum upp í þyrlu
Í aðdraganda Starfamessu Austurlands kynnum við fjölbreytt störf í landshlutanum. Dagný Ásta hjá Náttúrustofu Austurlands segir frá starfi þar sem gagnaúrvinnsla, hreindýratalningar og vettvangsvinna fléttast saman.
Nánar um Starfamessu Austurlands 2026Maður þarf ekki að hafa framtíðina á hreinu tvítugur
Þyrluflug yfir Austurlandi, úrvinnsla gagna, samskipti við fólk og stöku krufning á rotnu hreindýri eru meðal þess sem getur fallið til á vinnudegi Dagnýjar Ástu Viðars Þórhölludóttur. Hún er sviðsstjóri hreindýrarannsókna hjá Náttúrustofu Austurlands og segir fjölbreytnina eitt það skemmtilegasta við starfið.
Dagný Ásta fylgist með hreindýrastofninum á Austurlandi, safnar og vinnur úr gögnum um hann og tekur þátt í að leggja árlega til veiðikvóta sem styður við verndun og sjálfbæra stjórnun stofnsins.
Það er hins vegar erfitt að lýsa dæmigerðum vinnudegi.
Skrifstofudagarnir fara meðal annars í gagnaúrvinnslu, lestur, skipulagningu, skrif og samskipti við fjölbreyttan hóp fólks sem kemur að hreindýramálum. Inn á milli tekur svo við vettvangsvinna, til dæmis þyrluflug þar sem hreindýrin eru mynduð úr lofti og talin síðar eða krufningar á hreindýrahræjum til að afla upplýsinga um dýrin og stofninn.
„Mér finnst blandan af gagnaúrvinnslu, vettvangsvinnu og samskiptum við fólk alveg stórkostleg,“ segir Dagný Ásta. „Að geta bæði unnið í gögnunum og svo farið út og séð dýrin og umhverfið sem gögnin snúast um.“
Erfðafræðin vakti áhugann
Dagný Ásta er líffræðingur að mennt, með meistaragráðu í þróunarerfðafræði og stefnir á að verja doktorsritgerð í stofn- og þróunarerfðafræði í haust. Áhuginn á erfðafræði kviknaði snemma. Afi hennar, sem var sauðfjárbóndi og hrossaræktandi, hafði kennt henni svolítið um erfðafræði þegar hún var yngri og í framhaldsskóla heillaðist hún mjög af faginu.
Áhuginn var þó breiðari. Plöntur, vistkerfi, fuglar og annað sem tengdist líffræði þótti henni spennandi, þótt erfðafræði og þróunarfræði stæðu upp úr. Hún hafði hins vegar alls ekki séð fyrir sér að verða sviðsstjóri hreindýrarannsókna.
„Það er eiginlega það skemmtilega við það. Maður þarf ekkert endilega að vita tvítugur nákvæmlega hvar maður endar.“
Heimahagarnir höfðu líka sitt að segja. Dagný Ásta er frá Austurlandi og hafði lengi langað að flytja aftur heim. Þegar starf hjá Náttúrustofu Austurlands losnaði á sama tíma og hún var farin að sjá fyrir endann á doktorsnáminu fannst henni tímasetningin eiginlega ótrúleg.
Ældi eins og múkki en hélt áfram að skrá
Þyrluflug til að telja hreindýr eru meðal eftirminnilegustu vinnudaga Dagnýjar Ástu. Úr lofti hefur hún séð Austurland frá allt öðru sjónarhorni og flogið yfir staði sem hún hafði áður aðeins séð á korti.
Vettvangsvinna er þó ekki alltaf jafn glæsileg og hún kann að líta út fyrir að vera á myndum.
Í einu slíku flugi varð Dagný Ásta svo flugveik að hún „ældi eins og múkki“ en hélt engu að síður áfram að skrá GPS-staðsetningar dýranna og myndanúmer. Krufning á rotnu hreindýri í Vöðlavík kemst líka ofarlega á listann yfir eftirminnilega vinnudaga.
„Það var svona dagur sem var bæði hálfgerður leiðangur og mjög langt frá hefðbundnum skrifstofudegi.“
Sumarstörfin reyndust dýrmæt
Þótt langskólanám liggi að baki starfi Dagnýjar Ástu segir hún reynslu úr ýmsum sumarstörfum hafa nýst sér betur en ætla mætti. Á hjúkrunarheimilinu á Fjórðungssjúkrahúsinu í Neskaupstað lærði hún að eiga samskipti við mjög ólíkt fólk og hjá Síldarvinnslunni lærði hún að vinna við krefjandi aðstæður og halda út langa daga þegar þess þarf.
Hún vann einnig sumarstarf hjá Náttúrustofu Austurlands og fékk þar snemma að kynnast því hversu fjölbreytt náttúrufræðistörf geta verið. „Ég fór í sýnatökur á alls konar lífríki, kenndi börnum um náttúruna, greindi gögn, safnaði örsmáum þörungum úr jökulsám og taldi lirfur. Ef það er ekki fjölbreytt veit ég ekki hvað!“
Forvitni, úthald, sveigjanleiki og hæfni til að vinna með fólki nýtist því að hennar sögn ekki síður en bóknámið.
Leyfa lífinu aðeins að gerast
Það sem kom Dagnýju Ástu sjálfri einna mest á óvart í starfinu er hversu stór hluti þess snýst um samskipti og samstarf við fjölbreyttan hóp hagsmunaaðila. Hún hafði heldur ekki gert sér grein fyrir því hversu miklum og fjölbreyttum gögnum væri safnað um íslenska hreindýrastofninn. Samstarf við aðrar stofnanir, meðal annars í Noregi, hefur einnig verið skemmtilegur og óvæntur hluti starfsins.
Ráð hennar til ungs fólks sem er að velta framtíðinni fyrir sér er einfalt: Að þurfa ekki að ákveða allt strax.
„Bara að leyfa lífinu aðeins að gerast. Vera opin fyrir alls konar möguleikum og reyna að finna hvað vekur áhugann. Það má alveg vera meira en eitt og það má breytast með tímanum.“
Reynsla úr sumarstörfum, námskeiðum og verkefnum sem virðist ekki endilega tengjast framtíðarstarfinu geti síðar reynst óvænt dýrmæt.
„Maður þarf alls ekki að vera búinn að leggja allt lífið sitt út í smáatriðum þegar maður er tvítugur. Það væri nú næstum leiðinlegt ef maður ætlaði ekki að leyfa einhverju óvæntu að gerast.“
Starfamessa Austurlands 2026
Starfamessa Austurlands verður haldin í Íþróttahúsinu í Neskaupstað 24. september. Þar gefst ungu fólki tækifæri til að kynnast fjölbreyttum störfum og starfsleiðum á Austurlandi. Náttúrustofa Austurlands verður meðal þátttakenda á Starfamessunni.
Nánari upplýsingar um Starfamessuna og þátttöku fyrirtækja og stofnana veitir Páll Baldursson, verkefnastjóri hjá Austurbrú, í netfanginu [email protected].
Nánar um Starfamessu Austurlands 2024
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
