Um 500–600 gestir lögðu leið sína á Matarmót Austurlands sem haldið var í Sláturhúsinu á Egilsstöðum laugardaginn 14. nóvember. Aftakaveður og erfiðar samgöngur settu nokkurt strik í reikninginn og komust ekki allir skráðir sýnendur á staðinn. Þrátt fyrir það var góð stemning á mótinu og ánægja meðal þeirra framleiðenda sem tóku þátt.
Alls höfðu 25 matvælaframleiðendur skráð sig til þátttöku en vegna veðursins komust aðeins 16 þeirra á Matarmótið. Tveir sýnendur bættust í hópinn um klukkan fjögur síðdegis þegar heiðar og skörð opnuðust á ný.
Myrra Mjöll Daðadóttir, forstöðumaður Hallormsstaðaskóla, sem hafði umsjón með undirbúningi viðburðarins, segir að þrátt fyrir þessar hindranir hafi dagurinn tekist vel.
„Það var frábær stemning og allir sem ég talaði við glaðir með söluna og daginn,“ segir Myrra.
Hún áætlar að gestir hafi verið á bilinu 500–600, þótt ekki hafi farið fram formleg talning.
Matarmótið var haldið í sjötta sinn í ár og hefur fest sig í sessi sem vettvangur fyrir austfirska matvælaframleiðendur til að kynna og selja afurðir sínar. Þar gefst gestum tækifæri til að kynnast fjölbreyttri framleiðslu í landshlutanum, hitta fólkið á bak við vörurnar og versla beint við framleiðendur.
Mótið hefur jafnframt mikilvægu hlutverki að gegna við að efla tengsl milli framleiðenda og neytenda og vekja athygli á þeim verðmætum sem verða til í matvælaframleiðslu á Austurlandi.
Hallormsstaðaskóli hafði umsjón með skipulagningu Matarmótsins en Austurbrú aðstoðaði við skráningar og markaðssetningu. Skólinn hefur um árabil lagt áherslu á staðbundin hráefni, matarhefðir og matarnýsköpun og rekur meðal annars vottað tilraunaeldhús sem nýtist smáframleiðendum við vöruþróun.
Þótt veðrið hafi haft áhrif á þátttökuna sýndi Matarmótið enn á ný hversu mikilvægt það er að skapa vettvang þar sem framleiðendur og almenningur geta hist og átt viðskipti.
Skipuleggjendur þakka öllum sýnendum og gestum sem lögðu leið sína á Matarmótið, ekki síst þeim sem þurftu að takast á við erfiðar samgöngur til að komast á staðinn.
Ljósmyndir: Emma Charlotta Ärmänen.
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn