Haustþing SSA 2026: Austurland þarf ekki sérmeðferð
Haustþing Sambands sveitarfélaga á Austurlandi (SSA) kallar eftir breyttri nálgun ríkisins gagnvart Austurlandi og segir fjárfestingu í innviðum og þjónustu í landshlutanum skila sér í aukinni verðmætasköpun fyrir þjóðarbúið.
Þetta kemur fram í ályktun sem samþykkt var á haustþingi SSA í Neskaupstað í morgun. Þar er meðal annars vísað til nýrrar efnahagsgreiningar Kontext á Austurlandi sem sýnir að framlag landshlutans til þjóðarbúsins er langt umfram íbúahlutfall. Þótt aðeins um 2,8% landsmanna búi á Austurlandi stendur landshlutinn undir stórum hluta útflutnings og orkuframleiðslu þjóðarinnar, landsframleiðsla á mann er yfir landsmeðaltali og atvinnulífið skapar ríkinu verulegar skatt- og gjaldatekjur.
Í ályktuninni segir að Austurland sé ekki að kalla eftir sérmeðferð heldur skynsamlegri og sanngjarnri fjárfestingu í þeim forsendum sem geri landshlutanum kleift að halda áfram að skapa verðmæti fyrir þjóðina.
Jafnframt lýsir þingið áhyggjum af því að ríkisfjárfestingum á Austurlandi sé frestað og opinber starfsemi ríkisins sé hlutfallslega lítil á sama tíma og skatt- og gjaldtaka hafi aukist. Þar eru meðal annars nefnd veiði- og fiskeldisgjöld, fyrirhuguð hækkun virðisaukaskatts á baðlón og kílómetragjald.
Mikil samstaða um skilaboðin
Ragnar Sigurðsson, formaður SSA, sagði þegar hann sleit þinginu að mikil samstaða hefði ríkt um þau skilaboð sem Austurland vildi senda.
„Ég er mjög ánægður með þá miklu samstöðu sem ríkti á þinginu um þau skilaboð sem við viljum senda frá Austurlandi. Við erum stolt af því hversu mikið landshlutinn leggur til þjóðarbúsins og viljum auðvitað að sú verðmætasköpun haldi áfram að vaxa. Ályktunin snýst ekki um að Austurland eigi að fá einhverja sérmeðferð heldur að ríkið fjárfesti með skynsamlegum hætti í þeim innviðum og þeirri þjónustu sem áframhaldandi vöxtur byggir á. Ég held að við séum að senda héðan mjög skýr og sameinuð skilaboð um það.“
Í lokaorðum ályktunarinnar segir að tryggja þurfi Austurlandi sanngjarna hlutdeild í opinberri fjárfestingu, trausta grunninnviði og skilyrði til vaxtar. Slík fjárfesting styrki samfélögin á Austurlandi og skili um leið ávinningi til þjóðarbúsins alls.
Ályktun Haustþings SSA 2026 má lesa í heild hér.
Mynd efst: Fulltrúar á haustþingi SSA sem fram fór í Neskaupstað 17.–18. september.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
