Horft til sjávar á Umhverfisráðstefnu Austurlands
Rauði þráður ráðstefnunnar var sá að hafið er að breytast og að sjávarútvegur framtíðarinnar þurfi að byggja á aukinni þekkingu, betri gögnum, tæknilausnum og sjálfbærri nýtingu auðlinda.
Í erindum kom meðal annars fram að breytingar á hitastigi sjávar og vistkerfum hafi þegar áhrif á útbreiðslu nytjastofna og veiðimöguleika. Fjallað var um stöðu helstu uppsjávarstofna, þar á meðal loðnu, síldar, makríls og kolmunna, og þá óvissu sem fylgir loftslagsbreytingum á komandi áratugum.
Þá voru kynntar lausnir sem þróaðar eru innan evrópska rannsóknarverkefnisins MeCCAM þar sem markmiðið er að hjálpa sjávarútvegi að bregðast við áhrifum loftslagsbreytinga. Meðal annars var fjallað um nýtingu gervigreindar og stafrænna gagna til að bæta ákvarðanatöku í veiðum og draga úr umhverfisáhrifum.
Fjallað var um framtíð fiskeldis á Íslandi og þau tækifæri og áskoranir sem greinin stendur frammi fyrir, auk þess sem sjónum var beint að þróun veiða við Austurland á síðustu sex áratugum og tengslum þeirra við breytingar í umhverfi sjávar.
Orkuskipti í sjávarútvegi voru einnig fyrirferðarmikil á ráðstefnunni. Kynnt voru verkefni sem miða að aukinni rafvæðingu, betri orkunýtingu og meiri fullnýtingu í vinnslu sjávarafurða. Sjálfbærni í sjávarútvegi snýst um að hámarka nýtinguna á hráefninu okkar og skiptir hvert kíló máli. Jafnframt var bent á að tryggur aðgangur að orku og öflugir innviðir verði lykilforsenda áframhaldandi framfara í greininni.
Umhverfisráðstefna Austurlands er samstarfsverkefni Austurbrúar og Eyglóar og er ætlað að skapa vettvang fyrir samtal um umhverfismál og sjálfbæra þróun á Austurlandi. Að loknum erindum tóku þátttakendur þátt í umræðum og tengslamyndun þar sem áfram var rætt um þær breytingar og tækifæri sem blasa við sjávarútvegi og strandsamfélögum á komandi árum.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
