Vinnumálastofnun hefur gert svipaða samninga við allar símenntunarstöðvar á landinu og er markmiðið ávallt hið sama: Að bjóða náms- og starfsráðgjöf fyrir atvinnuleitendur sem tryggðir eru innan atvinnuleysistryggingakerfinsins. Í samningnum segir m.a. að lögð skuli áhersla á að virkja atvinnuleitendur, einkum þá sem hafa verið án vinnu í sex mánuði eða lengur, með náms- og starfsráðgjafaviðtölum eða öðrum þeim vinnumarkaðsúrræðum sem talin eru gagnast þessum hópi.

Í þessum tilgangi hefur Austurbrú hleypt af stokkunum þremur námskeiðum sem sérsniðin eru að þörfum þessa hóps. Um er að ræða námskeið sem kallast „Ferilskrá og áhugasvið“. Í því taka nemendur áhugasviðskönnun og verður svo skoðað hvernig hægt sé að nýta sér niðurstöðurnar. Farið verður yfir mikilvægi þess að koma sér upp góðri ferilskrá og hver og einn nemandi gerir sína eigin ferilskrá og fær aðstoð eftir þörfum. Þá býðst nemendum eftirfylgd í formi viðtals við náms- og starfsráðgjafa.

Þá verður boðið upp á tvö sjálfseflingarnámskeið. Annað kallast „Taktu stjórnina“ sem Hrönn Grímsdóttir, náms- og starfsráðgjafi og jógakennari, kennir en hitt kallast „Aukið sjálfstraust“ og er ætlað pólskumælandi nemendum. Sjá frétt.

Þorbjörg Ólöf Jónsdóttir, verkefnastjóri og námsráðgjafi hjá Austurbrú, segir þýðingu þessa samnings mikla fyrir Austurbrú og nemendahópanir séu nú þegar orðnir nokkuð stórir. „Við höfum ekki átt í formlegu samstarfi við VMST áður,“ segir hún. „Samsetning þessa nemendahóps kallar á nýjungar í okkar starfi. Við höfum t.d. aldrei kennt sjálfsstyrkingu á pólsku og það er gaman að segja frá því að kennarinn er innflytjandi frá Póllandi. Hann býr hér á svæðinu og það er einstaklega ánægjulegt að geta nýtt mannauðinn á Austurlandi í þessum tilgangi. Hér býr fjöldi innflytjenda sem hefur ýmis konar reynslu og þekkingu sem við vitum jafnvel ekki af. Hér kemur hún að góðum notum.“

Samningurinn var undirritaður í október og er kennslan hafin í „Auknu sjálfstrausti“ en kennsla á hinum námskeiðunum hefst í nóvember. Í skoðun er að halda fleiri námskeið í vetur og jafnvel verður boðið upp á einstaklingsviðtöl. „Við sjáum fyrir okkur að veita fjarþjónustu,“ segir Þorbjörg. „Þannig að fólk alls staðar á svæðinu á að geta komist til okkar í viðtal án mikillar fyrirhafnar. Það eina sem þú þarft er tölva eða snjalltæki.“