Ný stjórn SSA kjörin á aukaaðalfundi
Ný stjórn Sambands sveitarfélaga á Austurlandi (SSA) var kjörin á aukaaðalfundi sambandsins sem haldinn var í Þingmúla á Egilsstöðum fimmtudaginn 4. júní. Stjórnin var kjörin samkvæmt tillögu kjörnefndar með öllum greiddum atkvæðum.
Fundurinn markaði ákveðin tímamót í starfi SSA, en samkvæmt nýjum samþykktum sambandsins er nú haldinn sérstakur aukaaðalfundur í kjölfar sveitarstjórnarkosninga þar sem ný stjórn tekur við störfum.
Á fundinum flutti Berglind Harpa Svavarsdóttir, fráfarandi formaður SSA, skýrslu stjórnar þar sem hún fór yfir helstu verkefni og áherslur síðasta kjörtímabils. Hún lagði áherslu á mikilvægi samstöðu sveitarfélaga á Austurlandi og sagði að með sameiginlegri rödd gæti landshlutinn betur staðið vörð um hagsmuni sína gagnvart ríkinu.
Berglind rifjaði meðal annars upp vinnu SSA við gerð efnahagsgreiningar Austurlands sem unnin var af Analytica. Hún sagði greininguna hafa reynst öflugt tæki í hagsmunabaráttu landshlutans og sýnt með skýrum hætti mikilvægi Austurlands fyrir þjóðarbúið. Niðurstöður greiningarinnar sýna meðal annars að Austurland stendur undir um fjórðungi af vöruútflutningsverðmætum landsins þrátt fyrir að aðeins tæp þrjú prósent landsmanna búi á svæðinu.
Í ræðu sinni fjallaði hún einnig um áframhaldandi uppbyggingu innviða sem eitt helsta verkefni SSA á komandi árum. Þar nefndi hún meðal annars Fjarðarheiðargöng, heilsársveg um Öxi, uppbyggingu Suðurfjarðavegar, eflingu Egilsstaðaflugvallar, bætt fjarskipti og aukið orkuöryggi.
Að lokum þakkaði Berglind samstarfsfólki sínu í stjórn SSA, starfsfólki Austurbrúar og sveitarstjórnarfólki um allan fjórðung fyrir gott samstarf og óskaði nýrri stjórn velfarnaðar í störfum sínum.
Eftir fundinn kom nýkjörin stjórn saman og skipti með sér verkum. Ragnar Sigurðsson var kjörinn formaður stjórnar og Jónína Brynjólfsdóttir varaformaður.
Aðrir aðalmenn í stjórn SSA eru Hjördís Helga Seljan Þóroddsdóttir, Helgi Hlynur Ásgrímsson, Íris Edda Jónsdóttir og Lárus Heiðarsson.
Samkvæmt skipulagsskrá Austurbrúar skipa stjórnarmenn SSA jafnframt stjórn Austurbrúar. Nýkjörin stjórn SSA tekur því jafnframt við stjórn hennar.
Mynd efst f.v.: Bryndís Fiona Ford, Helgi Hlynur, Hjördís Helga, Hulda Auðunardóttir (kom í stað Lárusar), Ragnar, Íris Edda og Jónína.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
