Hafið og framtíðin
Sérfræðingar úr rannsóknum, atvinnulífi og sjávarútvegi ræða áhrif loftslagsbreytinga, orkuskipti, fiskeldi, fullnýtingu hráefna og framtíð auðlindanýtingar á Umhverfisráðstefnu Austurlands í Neskaupstað 5. júní.
Umhverfisráðstefna Austurlands horfir til sjávar
Umhverfisráðstefna Austurlands verður haldin í annað sinn fimmtudaginn 5. júní í Egilsbúð í Neskaupstað. Að þessu sinni verður sjónum beint að hafinu, sjávarútvegi og þeim breytingum sem fram undan eru í nýtingu auðlinda, orkuskiptum og þróun greinarinnar.
Ráðstefnan er samstarfsverkefni Austurbrúar og Eyglóar og er ætlað að skapa vettvang fyrir samtal um umhverfismál og sjálfbæra þróun á Austurlandi. Í fyrra var áherslan á byggingariðnað og framtíð mannvirkjagerðar en nú færist fókusinn að hafinu og þeim áskorunum og tækifærum sem blasa við sjávarútvegi og tengdum greinum á tímum loftslags- og tæknibreytinga.
Fram koma sérfræðingar úr rannsóknum, atvinnulífi og sjávarútvegi sem fjalla meðal annars um áhrif loftslagsbreytinga á hafið, orkuskipti í sjávarútvegi, fullnýtingu hráefna, fiskeldi og framtíðarhorfur uppsjávarstofna.
Mikilvæg umræða um framtíð sjávarútvegsins
„Sjávarútvegur er ein af grunnstoðum samfélaga á Austurlandi og þær breytingar sem nú eru að verða í greininni skipta landshlutann miklu máli. Með ráðstefnunni viljum við skapa vettvang þar sem fólk getur komið saman, miðlað þekkingu og rætt framtíðina — bæði áskoranirnar sem við stöndum frammi fyrir og þau tækifæri sem felast í nýsköpun, sjálfbærni og orkuskiptum,“ segir Sara Elísabet Svansdóttir, verkefnastjóri hjá Austurbrú.
Markmið ráðstefnunnar er að efla samtal, miðla þekkingu og skapa vettvang fyrir tengslamyndun þvert á atvinnulíf, rannsóknir og samfélag.
Á meðal fyrirlesara eru sérfræðingar frá Matís, Hafrannsóknastofnun, Samtökum fyrirtækja í sjávarútvegi og Síldarvinnslunni. Fundarstjóri verður Ísabella Ósk Másdóttir, verkefnastjóri samskipta hjá Umhverfis-, orku- og loftslagsráðuneytinu.
Boðið verður upp á súpu á Hótel Hildibrand frá klukkan 11:30 en dagskrá hefst í Egilsbúð klukkan 12:15. Að erindum loknum verður opið spjall og tengslamyndun.
Nánari upplýsingar og skráningFleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
