„Við hjá Vök Baths erum virkilega stolt og ánægð með að hljóta Nýsköpunarverðlaun ferðaþjónustunnar 2022,“ segir Aðalheiður Ósk Guðmundsdóttir, framkvæmdastjóri.
Vök hlýtur Nýsköpunarverðlaun ferðaþjónustunnar
Vök Baths er handhafi Nýsköpunarverðlauna ferðaþjónustunnar árið 2022, en Samtök ferðaþjónustunnar (SAF) afhenda verðlaunin á afmælisdegi samtakanna, 11. nóvember ár hvert. Eliza Reid, forsetafrú, afhenti Vök Baths verðlaunin við hátíðlega athöfn í Hörpu þann 11. nóvember sl.
SAF afhenda Nýsköpunarverðlaun fyrir athyglisverðar nýjungar og er markmiðið að hvetja fyrirtæki innan samtakanna til nýsköpunar. Verðlaununum er ætlað að hvetja frumkvöðla landsins til dáða í ferðaþjónustu. Þetta er í nítjánda skipti sem SAF veita nýsköpunarverðlaun ferðaþjónustunnar en þetta árið bárust 14 tilnefningar í samkeppninni um verðlaunin.
Mynd: (f.v.) Eliza Reid, forsetafrú, Aðalheiður Ósk Guðmundsdóttir, framkvæmdastjóri Vök Baths, Ívar Ingimarsson, stjórnarmaður hjá Vök Baths og Bjarnheiður Hallsdóttur, formaður Samtaka ferðaþjónustunnar ásamt. (SAF/EÁ)
Fljótandi sjóndeildarlaugar
Vök Baths eru heitar laugar sem staðsettar eru á bakka Urriðavatns við Egilsstaði á Austurlandi. Böðin samanstanda af tveimur fljótandi sjóndeildarlaugum, einu sinnar tegundar á Íslandi, tveimur heitum laugum á landi, vaðlaug, eimbaði, köldum úða göngum og veitingastaðnum Vök Bistro. Vök Baths dregur nafn sitt af heitum vökum sem birtust reglulega á ísi lögðu Urriðavatninu vegna jarðhita sem streymdi upp á yfirborðið. Fljótandi laugarnar, eða „vakirnar“, sem nú liggja í vatninu hafa þannig sama form og þær sem mynduðust á ísi lögðu vatninu. Gestum Vök Baths býðst ekki bara að baða sig í heitu laugunum og köldu Urriðavatninu því í móttöku staðarins er tebar þar sem hægt er að gæða sér á te sem gert er úr jurtum úr nágrenninu og blandað við heitt vatnið sem kemur beint úr jörðinni.
Mikið aðdráttarafl fyrir Austurland
Hönnun staðarins endurspeglar þema náttúrunnar í kring og leikur lerki þar lykilhlutverk sem allt var sótt í Hallormsstaðaskóg, elsta þjóðskóg Íslands. Mikil áhersla er lögð á að sækja í staðbundin hráefni þar sem unnt er. Má þar nefna lífrænt ræktaðar jurtir frá Vallanesi á tebarnum og bjóra sem framleiddir eru í samstarfi við brugghúsið Austra. Vök Baths er mikilvæg og ánægjuleg nýjung fyrir Austurland. Staðurinn hefur bæði mikið aðdráttarafl fyrir erlenda sem innlenda ferðamenn en er um leið nýjung í þjónustu á svæðinu sem færir aukin lífsgæði til heimamanna og nærsveitunga.
Að dreifa fjárfestingum og uppbyggingu um landið
„Vök Baths er mjög gott dæmi um mikilvægi þess að við hugsum ekki aðeins um það að dreifa ferðamönnum um landið heldur að dreifa fjárfestingum og uppbyggingu um landið,“ segir Aðalheiður Ósk Guðmundsdóttir, framkvæmdastjóri. Fjárfesting og uppbygging sem þessi laðar ferðamenn hvaðanæva að til þess að heimsækja Austurland. Þeir eru líklegri til að staldra við og nýta þá þjónustu sem þar er í boði og kynna sér hvað samfélagið á Austurlandi hefur upp á að bjóða. Það að hljóta Nýsköpunarverðlaun ferðaþjónustunnar veitir okkur góðan byr til að gera enn betur.“
Nánar á vef SAF
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
