Austurland á ITB Berlin
Dagana 3.–5. mars var Austurland kynnt á ferðasýningunni ITB Berlin í Berlín, sem er ein stærsta ferðaþjónustusýning heims. Fulltrúi frá Austurbrú og ferðaþjónustuaðilar á Austurlandi tóku þátt í sýningunni og kynntu svæðið sem spennandi áfangastað fyrir erlenda ferðamarkaði.
Á sýningunni stóð Sigrún Jóhanna Þráinsdóttir vaktina á bás Íslandsstofu ásamt fulltrúum annarra landshlutamarkaðsstofa. Þar átti hún fjölda samtala við erlendar og innlendar ferðaskrifstofur, ferðaskipuleggjendur og aðra samstarfsaðila í ferðaþjónustu.
„Ég átti mörg góð og uppbyggileg samtöl í Berlín þar sem áhuginn beindist fyrst og fremst að því hvað væri nýtt og spennandi á svæðinu. Sérstaklega var mikið spurt um afþreyingu og upplifanir utan hefðbundinnar háannar, sem endurspeglar aukinn áhuga ferðamarkaðarins á fjölbreyttari ferðatímum og upplifunum yfir árið. Fyrir okkur er afar mikilvægt að vera vel upplýst um þá starfsemi og þróun sem á sér stað á Austurlandi, svo við getum með markvissum hætti miðlað þeim upplýsingum áfram og kynnt svæðið sem áhugaverðan áfangastað,“ segir Sigrún Jóhanna.
Mynd efst: Fulltrúar Austurlands á ITB Berlin f.v.: Sigfinnur Björnsson, Sigrún Jóhanna, Aðalheiður Ósk Guðmundsdóttir og Friðrik Árnason.
Með þátttöku á sýningum á borð við ITB í Berlín gefst mikilvægt tækifæri til að efla tengsl við alþjóðlega samstarfsaðila, kynna nýjar upplifanir á Austurlandi og styrkja stöðu svæðisins á alþjóðlegum ferðamarkaði.
Einnig tóku ferðaþjónustuaðilar frá Austurlandi þátt í sýningunni, þar á meðal Tanni Travel, Hótel Breiðdalsvík og Travel East.
Áfangastaðastofa Austurlands hvetur ferðaþjónustuaðila og aðra sem starfa á svæðinu til að senda upplýsingar um nýjungar, þróun og áhugaverð verkefni sem eiga sér stað á Austurlandi. Slíkar upplýsingar nýtast vel í kynningarstarfi svæðisins á alþjóðlegum vettvangi.
Upplýsingar má senda á netfangið: [email protected]
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
