Austurbrú hefur látið vinna stöðugreiningu á samvinnurýmum á Austurlandi þar sem farið er yfir stöðu þeirra, möguleika til frekari þróunar og hlutverk þeirra í breyttu atvinnuumhverfi. Markmið verkefnisins var að kortleggja aðstöðu á svæðinu og skoða hvernig samvinnurými geta stutt við óstaðbundin störf, nýsköpun og fjölbreyttara atvinnulíf.

Í skýrslunni er yfirlit yfir þau rými sem þegar eru til staðar víða um Austurland, auk greiningar á mismunandi þörfum eftir byggðakjörnum. Niðurstöður íbúakönnunar sýna að töluverður áhugi er á samvinnurýmum, meðal annars vegna betri vinnuaðstöðu, aukinnar félagslegrar tengingar og sveigjanleika í vinnu .

Verkefnið var unnið af Söru Elísabetu Svansdóttur og byggir á kortlagningu, gagnaöflun og könnun meðal íbúa. Einnig var horft til nýlegra rannsókna á óstaðbundnum störfum sem benda til þess að sameiginleg vinnuaðstaða geti skipt miklu máli fyrir þróun slíkra starfa á landsbyggðinni .

Í skýrslunni er bent á að samvinnurými geti orðið mikilvægur innviður fyrir byggðaþróun á Austurlandi, en jafnframt að tryggja þurfi skýran rekstrargrundvöll, góða tæknilega innviði og sveigjanlegar lausnir sem taka mið af þörfum hvers staðar. Lagt er til að vinna haldi áfram með frekari kortlagningu, samráði og þróun rekstrarlíkana fyrir slík rými .

Verkefnið tengist áherslum Sóknaráætlunar Austurlands en skýrsluna má nálgast hér. Það er unnið með stuðningi úr byggðaáætlun stjórnvalda (aðgerð C1 – sértæk verkefni sóknaráætlanasvæða), þar sem Samband sveitarfélaga á Austurlandi (SSA) hlaut styrk til uppbyggingar samvinnurýma og kortlagningar á stöðu þeirra á svæðinu.