Mánudaginn 20. apríl verður haldið málþing í Vonarlandi á Egilsstöðum þar sem rætt verður um stöðu safna og bókasafna á Austurlandi, hlutverk þeirra í samfélaginu og hvernig megi efla starfsemina á komandi árum.

Að sögn Signýjar Ormarsdóttur, verkefnastjóra menningarmála hjá Austurbrú, kviknaði hugmyndin í kjölfar þátttöku hennar í Farskóla FÍSOS, árlegri fagráðstefnu íslenskra safna og safnafólks. „Mér fannst umræðan þar eiga fullt erindi inn í okkar minna samfélag, sérstaklega hér á Austurlandi,“ segir hún. „Það er mikilvægt að við tökum þetta samtal af og til, hittumst og veltum fyrir okkur hvert við viljum stefna.“

Á Austurlandi er að finna fjölbreytt söfn víða um landshlutann. Signý segir þó stöðuna um margt misjafna. Sum söfn séu í öflugri uppbyggingu, svo sem Safnahúsið á Egilsstöðum og Tækniminjasafnið á Seyðisfirði, en víða séu líka áskoranir. „Við erum enn á stað þar sem varðveisla er ekki viðunandi mjög víða og mætti miklu betur fara,“ segir hún. „Það vantar líka víða fleiri hendur inn í safnastarfið.“

Á málþinginu flytja fjórir gestir erindi frá ólíkum sjónarhornum. Þóra Björk Ólafsdóttir, framkvæmdastjóri Safnaráðs, fjallar um viðurkennd söfn og þau tækifæri sem þar kunna að felast. Barbara Guðnadóttir, safnstjóri Borgarbókasafns Grófinni, ræðir samfélagslegt gildi almenningsbókasafna og segir Signý mikilvægt að horfa til bókasafna sem miklu meira en staða þar sem bækur eru lánaðar út. „Almenningsbókasöfn geta verið miðjan í samfélögum,“ segir hún. „Þau snúast um miklu meira en bækur í hillu.“

Hlín Gylfadóttir hjá Borgarsögusafni fjallar um samfélagsverkefni, aðgengismál og inngildingu og Elsa Guðný Björgvinsdóttir, menningarfulltrúi Múlaþings og fyrrverandi safnstjóri Minjasafns Austurlands, ætlar vera með innleiðingu inn í vinnustofurnar sem haldnar verða að loknum erindunum. Á þeim á m.a. að ræða tengsl safna og ferðaþjónustu, samstarf safna á Austurlandi, varðveisluhúsnæði og inngildingu.