Afkastageta skiptir sköpum
„Mikilvægt er að auka afkastagetu Egilsstaðaflugvallar þannig að hægt sé að taka við fleiri flugvélum í einu, sérstaklega ef Keflavíkurflugvöllur lokar með stuttum fyrirvara“ segir Bogi Nils Bogason, forstjóri Icelandair.
Ráðstefnan „Austurland sem alþjóðleg fluggátt“ verður á Egilsstöðum 30. apríl.
Nánari upplýsingar og skráningTenging við Keflavík opnar nýjar leiðir
Að mati Boga Nils Bogasonar, forstjóra Icelandair, felast tækifæri í þróun millilandaflugs um Egilsstaðaflugvöll m.a. í sterkari tengingu við Keflavíkurflugvöll og þar með inn í alþjóðlegt leiðakerfi. Hann verður meðal fyrirlesara á ráðstefnunni „Austurland sem alþjóðleg fluggátt“ sem fram fer á Egilsstöðum 30. apríl.
Bogi segir að raunhæfasta leiðin til að efla alþjóðlegar tengingar um Egilsstaði sé að byggja á tengingu við Keflavík. „Að mati okkar hjá Icelandair væri besta alþjóðatengingin fyrir bæði Austur- og Norðurland að bæta við beinu flugi til Keflavíkurflugvallar sem myndi tengjast inn í öflugt leiðakerfi Icelandair til yfir 60 áfangastaða í Evrópu og Norður-Ameríku,“ segir hann en bendir þó á að slíkar tengingar byggi á nægri eftirspurn.
Bogi segir einnig að tækifæri felist í sveigjanlegri lausnum samhliða áætlunarflugi.
„Auðvitað liggja einnig tækifæri í að nýta Egilsstaðaflugvöll fyrir eftirspurnardrifið leiguflug bæði fyrir íbúa Austurlands á leið út í heim og ferðamenn til svæðisins,“ segir hann.
Hann segir jafnframt að Egilsstaðaflugvöllur gegni mikilvægu hlutverki sem einn af fjórum alþjóðaflugvöllum landsins og sem varaflugvöllur fyrir Keflavíkurflugvöll. „Það er mikilvægt að halda áfram uppbyggingu hans svo hann geti tekið við aukinni umferð. Það myndi styrkja stöðu hans enn frekar, bæði sem varaflugvallar og fyrir almennar alþjóðatengingar,“ segir hann.
Mikilvæg tenging og öryggishlutverk
Að mati Boga gegnir Egilsstaðaflugvöllur þegar lykilhlutverki í flugkerfi landsins.
„Egilsstaðaflugvöllur er mjög mikilvæg tenging Austurlands við höfuðborgarsvæðið og það skiptir sköpum fyrir samfélagið fyrir austan að hafa áreiðanlegar og tíðar tengingar við Reykjavík,“ segir hann.
Þá gegnir völlurinn einnig mikilvægu hlutverki í öryggi flugkerfisins í heild.
„Egilsstaðaflugvöllur er einn af fjórum varaflugvöllum þegar ekki er hægt að lenda á Keflavíkurflugvelli, til dæmis vegna veðurs, eldgosa, flugatvika eða tæknibilana.“
Þarf að geta tekið við meiri umferð
Til að mæta auknum kröfum segir Bogi mikilvægt að halda áfram uppbyggingu. „Því er mjög mikilvægt að halda flugvellinum við og efla hann svo hann geti tekið við enn meiri umferð,“ segir hann.
Hann leggur jafnframt áherslu á að auka þurfi afkastagetu.
„Mikilvægt er að auka afkastagetu Egilsstaðaflugvallar þannig að hægt sé að taka við fleiri flugvélum í einu, sérstaklega ef Keflavíkurflugvöllur lokar með stuttum fyrirvara.“
Skýr skilaboð
Bogi segir að þessi atriði verði í forgrunni í erindi hans á ráðstefnunni.
„Kjarninn í mínum skilaboðum verður að minna á mikilvægi Egilsstaðaflugvallar sem varaflugvallar fyrir alþjóðaflug, og á mikilvægi öflugs innanlandsflugs og undirstrika þá möguleika sem alþjóðatenging við Keflavíkurflugvöll myndi skapa. Þá mun ég jafnframt benda á þýðingu þess að auka afkastagetu flugvallarins þannig að hægt sé að taka við fleiri flugvélum í einu, sérstaklega ef Keflavíkurflugvöllur lokar með stuttum fyrirvara,“ segir hann.
Ráðstefnan um hlutverk Egilsstaðaflugvöllur fer fram 30. apríl og hefst kl. 13:00 í Valaskjálf á Egilsstöðum. Þar munu lykilaðilar í flugi, atvinnulífi og ferðaþjónustu fjalla um tækifæri og áskoranir í þróun flugsamgangna og tenginga Austurlands við umheiminn.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
