„Viðburðir sem þessi byggja upp trú á eigin getu hjá þeim sem eru rétt að byrja“
Frá býflugum í Hallormsstaðaskógi til Grósku
„Fyrir þá sem eru að stíga sín fyrstu skref í nýsköpun er slíkt umhverfi ómetanlegt. Það að fá að æfa framsetningu hugmyndar, miðla henni til annarra og fá viðbrögð í öruggu og styðjandi umhverfi. Þetta getur skipt sköpum fyrir áframhaldandi þróun verkefna og sjálfstraust frumkvöðla.“
Þetta segir Sæunn Vigdís Sigvaldadóttir, býflugnabóndi í Hallormsstaðaskógi, sem tók þátt í viðburðinum „Nýsköpun á landsbyggðinni“ á Nýsköpunarvikunni í Reykjavík á dögunum.
Viðburðurinn var haldinn í Grósku á vegum landshlutasamtaka sveitarfélaga og Byggðastofnunar undir merkjum Startup Landsins, nýsköpunarhraðals fyrir frumkvöðla á landsbyggðinni. Þar komu saman þátttakendur úr hraðlinum, frumkvöðlar, fjárfestar og fólk úr stuðningsumhverfi nýsköpunar víðs vegar af landinu.
Styrkir samfélag frumkvöðla
Sæunn kynnti þar verkefnið sitt sem hefur vakið athygli út fyrir landshlutann. Hún ræktar býflugur í Hallormsstaðaskógi og vinnur fjölbreyttar afurðir úr bývaxi og hunangi auk þess að stefna að frekari uppbyggingu og þróun íslenskrar býflugnaræktar.
Að hennar sögn gegna viðburðir á borð við þennan mikilvægu hlutverki fyrir fólk sem er með hugmyndir á frumstigi eða er að taka sín fyrstu skref í frumkvöðlastarfi. „Viðburðir sem þessi styrkja samfélag frumkvöðla og byggja upp trú á eigin getu hjá þeim sem eru rétt að byrja.“
Hlusta á viðtal við Sæunni
Reynsla annarra dýrmæt
Startup Landið er samstarfsverkefni landshlutasamtaka sveitarfélaga um allt land og Byggðastofnunar. Markmiðið er að styðja við frumkvöðla á landsbyggðinni með fræðslu, handleiðslu, tengslamyndun og stuðningi við þróun hugmynda og verkefna. „Það er afar dýrmætt að heyra frá aðilum sem eru lengra komnir á sinni vegferð,“ segir hún um þátttökuna í Startup Landinu. „Samtal um reynslu, áskoranir, árangur og mistök hjálpar okkur sem erum að stíga fyrstu skrefin. Hjálpar okkur að sjá að leiðin frá hugmynd til framkvæmdar er bæði möguleg og þess virði að fara.“
Opið fyrir umsóknir í Startup Landið
Nú er opið fyrir umsóknir í næstu umferð Startup Landsins og er umsóknarfrestur til 1. september.
Kannastu við að vera með hugmynd sem þú hefur lengi velt fyrir þér? Verkefni sem þú hefur kannski ekki haft tíma, tengsl eða kjark til að þróa áfram?
Þá gæti Startup Landið verið næsta skref.
Þau sem vilja þróa hugmynd áfram eða kanna hvort Startup Landið henti þeirra verkefni geta haft samband við ráðgjafa Austurbrúar.
Nánar um Startup Landið
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
