Grunnlína lögð fyrir austfirska matvælaframleiðslu
Nýtt rannsóknarverkefni Austurbrúar mun kortleggja umfang austfirskrar matvælaframleiðslu og hversu stór hluti hennar er nýttur innan landshlutans.
Austurbrú hlýtur styrk úr Byggðarannsóknasjóði
Austurbrú hefur hlotið 3,4 milljóna króna styrk úr Byggðarannsóknasjóði Byggðastofnunar fyrir verkefnið Matvælaframleiðsla og staðbundin nýting: Kortlagning framleiðslu og svæðisbundinnar nýtingar á Austurlandi 2023–2025.
Tilgangur verkefnisins er að kortleggja matvælaframleiðslu á Austurlandi á árunum 2023 til 2025 og meta hversu stór hluti framleiðslunnar er nýttur innan svæðisins undir formerkjum austfirskra matvæla. Verkefnið nær bæði til hefðbundinnar matvælaframleiðslu, svo sem kjöt-, mjólkur-, fisk- og kartöfluframleiðslu, og hlunnindanýtingar á borð við eggjatínslu, berjatekju og silungsveiði í vötnum.
Kortlagning á matvælaframleiðslu
Í verkefninu verða opinber gögn sameinuð við viðbótargagnaöflun frá smærri framleiðendum með það að markmiði að byggja upp heildstætt gagnasafn og skýrt verklag sem hægt verður að endurtaka síðar. Niðurstöðurnar eiga að skapa mikilvæga grunnlínu fyrir matvælaframleiðslu á Austurlandi sem nýtast mun við stefnumótun og mat á árangri verkefna á sviði byggða- og atvinnuþróunar.
Mikil áhersla hefur verið lögð á að efla hlutdeild austfirskra matvæla í landshlutanum, bæði í sveitarfélögum og í Sóknaráætlun Austurlands. Til þess að hægt sé að meta árangur slíkra markmiða þarf fyrst að liggja fyrir skýr mynd af stöðunni í dag.
Eflir þekkingu á byggðamálum
Byggðarannsóknasjóður var stofnaður árið 2014 af sjávarútvegs- og landbúnaðarráðherra með það að markmiði að efla byggðarannsóknir og styrkja þekkingargrunn fyrir stefnumótun og aðgerðir í byggðamálum. Byggðastofnun sér um umsýslu sjóðsins.
Úthlutun styrkja úr sjóðnum fór fram á ársfundi Byggðastofnunar sem haldinn var á Kirkjubæjarklaustri þann 28. maí síðastliðinn.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
