Haustfundur ferðaþjónustunnar á Austurlandi fór fram á Seyðisfirði 22. október. Þar komu ferðaþjónustuaðilar víðs vegar að af Austurlandi saman til að miðla reynslu, fræðast og efla tengsl sín á milli. Á fundinum voru jafnframt afhent hvatningarverðlaun ferðaþjónustunnar á Austurlandi.

Dagskrá fundarins var fjölbreytt og meðal annars fjallað um markaðssetningu, ímynd ferðaþjónustunnar, samfélagsmiðla og áhrif gervigreindar á sýnileika fyrirtækja og ákvarðanir ferðamanna. Fulltrúar Visit Austurland, Seyðisfjörður – allt árið, Íslandsstofu, Samtaka ferðaþjónustunnar, Íslenska ferðaklasans og Digido deildu þekkingu sinni og reynslu með fundargestum.

Rætt var um liðið ferðaþjónustuár, nýja markaðsherferð Íslandsstofu og tækifæri til að þróa og kynna fjölbreytta upplifun á Austurlandi allan ársins hring.

Haustfundurinn er þó ekki síður vettvangur fyrir ferðaþjónustufólk til að hittast, kynnast og njóta þess sem landshlutinn hefur upp á að bjóða. Í hádeginu hélt hópurinn upp á útsýnispallinn Baug Bjólfs þar sem boðið var upp á súpu í góðu veðri og með stórbrotnu útsýni yfir Seyðisfjörð.

Hvatningarverðlaun afhent

Á fundinum voru afhent hvatningarverðlaun ferðaþjónustunnar á Austurlandi. Að þessu sinni hlaut Árni Magnús Magnússon hjá Fjord Bikes viðurkenninguna Frumkvöðulinn 2026 fyrir frumkvæði og uppbyggingu nýrra tækifæra í ferðaþjónustu á Borgarfirði eystri.

Klettinn 2026 hlaut Guðröður Hákonarson, betur þekktur sem Gurri, hjá Hildibrand í Neskaupstað. Viðurkenningin er veitt fyrir áralangt og farsælt framlag til uppbyggingar ferðaþjónustu á Austurlandi.

Að lokinni formlegri dagskrá var farið í leiðsögn um Seyðisfjörð þar sem þátttakendur kynntust sögu bæjarins og mannlífi. Einnig var komið við á Tækniminjasafni Austurlands áður en deginum lauk með kvöldverði og skemmtun.

Haustfundurinn er mikilvægur samstarfsvettvangur ferðaþjónustunnar á Austurlandi. Þar gefst tækifæri til að miðla hugmyndum, efla tengslanet og sækja innblástur fyrir áframhaldandi þróun greinarinnar.