Ný þekking fyrir breytt haf
Katrín Hulda Gunnarsdóttir, verkefnastjóri hjá Matís, verður meðal fyrirlesara á Umhverfisráðstefnu Austurlands 5. júní þar sem hún fjallar um evrópska verkefnið MeCCAM og hvernig sjávarútvegur getur brugðist við áhrifum loftslagsbreytinga með aukinni þekkingu, samstarfi og nýjum lausnum.
Loftslagsbreytingar kalla á breytingar í sjávarútvegi
Að mati Katrínar Huldu Gunnarsdóttur, verkefnastjóra hjá Matís, munu loftslagsbreytingar hafa sífellt meiri áhrif á sjávarútveg í Evrópu á komandi árum. Hún vinnur að evrópska verkefninu MeCCAM sem snýr að því að þróa mótvægis- og aðlögunaraðgerðir gagnvart áhrifum loftslagsbreytinga í sjávarútvegi. Katrín verður meðal fyrirlesara á Umhverfisráðstefnu Austurlands sem fram fer í Egilsbúð í Neskaupstað 5. júní undir yfirskriftinni Horfum til sjávar.
Í erindi sínu mun hún fjalla um lausnir sem verið er að þróa innan verkefnisins og hvernig sjávarútvegur getur brugðist við breytingum í hafinu með aukinni þekkingu, samstarfi og nýsköpun.
Mismunandi áskoranir víða um Evrópu
Katrín segir MeCCAM verkefnið taka mið af því hversu ólíkar aðstæður sjávarútvegs eru innan Evrópu.
„Það nær frá Grikklandi og Kýpur í austri, þar sem starfa smábátasjómenn sem hver á sinn bát og veiða á handfæri, til stórra útgerða eins og við þekkjum hér vestast í Evrópu,“ segir hún.
Þrátt fyrir ólíkar aðstæður segir hún mörg sameiginleg úrlausnarefni blasa við.
„Eins og gefur að skilja eru þarfir þessara hópa ólíkar en það er samt ótrúlegt hvað margt er sameiginlegt líka.“
Verkefnið snýst meðal annars um þróun lausna sem geta verið tæknilegar, efnahagslegar eða tengst stjórnsýslu og bættri nýtingu auðlinda.
Breytingar í hafinu þegar farnar að hafa áhrif
Katrín segir einn þátt verkefnisins snúa að því að greina áhrif loftslagsbreytinga á fiskistofna og vistkerfi hafsins.
„Loftslagsbreytingar geta bæði valdið breytingum á útbreiðslu og auknu álagi á viðkvæma stofna,“ segir hún.
Hún bendir á að samstarfsaðilar verkefnisins við Miðjarðarhafið séu þegar farnir að sjá breytingar á útbreiðslu tegunda vegna hlýnunar sjávar.
„Eitt markmið þeirra er að finna leiðir til að glíma við nýjar, eitraðar og hættulegar tegundir.“
Að hennar sögn þarf að skoða hvaða loftslagsbreytur hafi áhrif á útbreiðslu tegunda og hvernig þær muni þróast á næstu árum.
„Þetta verður svo notað til að reyna að spá fyrir um breytingar í vistkerfunum og hvernig þær geta haft áhrif á veiðar framtíðarinnar.“
Gagnaöflun geti skapað ný tækifæri
Aðspurð um tækifæri og áskoranir fyrir íslenskan sjávarútveg segir Katrín breytingar á útbreiðslu tegunda geta skapað bæði.
„Nytjastofnar flakka um hafið og fylgja ekki landamærum,“ segir hún og bendir á að mikilvægt sé að ríki nái samkomulagi um nýtingu tegunda sem færast á milli hafsvæða.
Einn þáttur verkefnisins snýr að því að skoða hvernig slíkt samstarf geti gengið fyrir sig og hver kostnaðurinn geti orðið ef ríki vinni ekki saman.
Þá segir Katrín íslenskan sjávarútveg búa yfir verðmætum gögnum sem geti nýst betur í framtíðinni.
„Bæði útgerðir og opinberir aðilar hafa árum saman safnað gríðarlegu magni gagna sem eru til svo margs nýtileg.“
Í MeCCAM sé meðal annars verið að skoða hvort gögnin geti haft forspárgildi um útbreiðslu tegunda og hvort hægt sé að nýta þau til að bæta veiðiferðir.
Íslenskar lausnir í fókus
Vegna umfangs verkefnisins segir Katrín að hún muni í erindi sínu leggja sérstaka áherslu á þær lausnir sem verið er að þróa hér á landi.
„Tvær þeirra eru tæknilausnir sem fyrirtækin Stika og Trackwell eru að þróa en tvær tengjast nýtingu tegunda, og standa Brim og Matís að þeim,“ segir hún.
Umhverfisráðstefna Austurlands – Horfum til sjávar
Umhverfisráðstefna Austurlands fer fram í Egilsbúð í Neskaupstað 5. júní undir yfirskriftinni Horfum til sjávar. Þar munu sérfræðingar úr rannsóknum, atvinnulífi og sjávarútvegi fjalla um loftslagsbreytingar, orkuskipti, fiskeldi, fullnýtingu hráefna og framtíð sjávarútvegs á Austurlandi.
Nánari upplýsingar og skráning
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
