Nýsköpunarverkefnin Dálæti og Fjarðarhjól eru meðal fjórtán verkefna sem valin hafa verið til þátttöku í viðskiptahraðlinum Startup Landið 2026. Hraðallinn er ætlaður frumkvöðlum og smáfyrirtækjum á landsbyggðinni og er Austurbrú meðal samstarfsaðila verkefnisins.

Austfirsku verkefnin tvö eru af ólíkum toga. Að baki Dálæti stendur Guðdís Jóhannadóttir, sem vinnur að hönnun og framleiðslu á séríslenskum skartgripum og öðrum vörum sem vekja fortíðarþrá og kátínu. Fjarðarhjól ehf. er verkefni Árna Magnúsar Magnússonar og snýst um hjóla- og afþreyingarferðaþjónustu sem nýtir náttúru og landslag Austfjarða.

Alls taka fjórtán verkefni víðs vegar af landinu þátt í hraðlinum í ár. Þau spanna fjölbreytt svið, meðal annars matvælaframleiðslu, heilsueflingu, tækni, ferðaþjónustu og skapandi greinar.

Fræðsla, ráðgjöf og tengslamyndun

Startup Landið er sjö vikna viðskiptahraðall sem hefur það að markmiði að efla nýsköpun, atvinnulíf og verðmætasköpun á landsbyggðinni. Þátttakendur fá aðgang að fræðslu, sérfræðiráðgjöf og tengslaneti sem nýtist þeim við að þróa hugmyndir sínar og byggja upp sjálfbæran rekstur.

Dagana 25. og 26. september komu þátttakendur, ráðgjafar og samstarfsaðilar saman í Borgarnesi á tveggja daga vinnustofu þar sem áhersla var lögð á tengslamyndun, skapandi hugsun og áframhaldandi þróun verkefnanna.

Á næstu vikum vinna teymin meðal annars að mótun viðskiptalíkana, fjármögnun og markaðssetningu með aðstoð reyndra leiðbeinenda.

Hraðlinum lýkur með sameiginlegum lokaviðburði á Selfossi 6. nóvember þar sem þátttakendur kynna verkefni sín.

Startup Landið er samstarfsverkefni landshlutasamtaka og atvinnuþróunarfélaga víðs vegar um landið, þar á meðal Austurbrúar.

Nánari upplýsingar má finna á vef Startup Landsins.