Ráðherra kynnti sér ferðaþjónustu á Austurlandi
Hanna Katrín Friðriksson atvinnuvegaráðherra heimsótti ferðaþjónustufyrirtæki á Austurlandi á dögunum. Ferðaþjónustuaðilar ræddu við ráðherra um þau tækifæri sem felast í frekari uppbyggingu ferðaþjónustu á svæðinu, ekki síst yfir vetrartímann, en einnig áskoranir sem greinin stendur frammi fyrir.
Ferðaþjónustuaðilar lögðu meðal annars áherslu á þá miklu möguleika sem felast í auknum komum ferðamanna til Austurlands yfir vetrartímann og mikilvægi beins millilandaflugs í því samhengi. Þá komu fram áhyggjur af auknum álögum á ferðaþjónustuna, meðal annars virðisaukaskatti á baðlón, sem að mati ferðaþjónustuaðila veikir samkeppnishæfni fyrirtækja á landsbyggðinni og vinnur gegn markmiðum um aukna dreifingu ferðamanna um landið.
Heimsókn ráðherra hófst í Neskaupstað þar sem hún ávarpaði haustþing Sambands sveitarfélaga á Austurlandi. Þar lagði Hanna Katrín áherslu á að ferðaþjónustan fengi mikið vægi í atvinnustefnu Íslands og sagði jafnframt unnið að heildarendurskoðun á stjórnsýslu ferðaþjónustunnar.
Ráðherra sagði mikilvægt að efla stuðning við svæði þar sem árstíðasveifla í ferðaþjónustu væri mikil, laða þangað fleiri gesti og stuðla þannig að betri dreifingu ferðamanna yfir árið. Eitt verkfæranna í þeirri vinnu væri Framkvæmdasjóður ferðamannastaða en á næsta ári verða um 800 milljónir króna til úthlutunar úr sjóðnum, með áherslu á minna sótt svæði.
Þá ræddi ráðherra fyrirhugað náttúru- og innviðagjald á fjölsóttum ferðamannastöðum í eigu ríkisins. Markmiðið væri að þeir sem nýta náttúru og innviði landsins tækju sanngjarnan þátt í þeim kostnaði sem af því hlýst.
Myndir að ofan
Mynd 1: F.v. Hanna Katrín Friðriksson, Sævar Guðjónsson og Berglind Ingvarsdóttir hjá Mjóeyri, Eydís Ásbjörnsdóttir þingmaður og Sveinn Sigurbjarnarson og Sigfinnur Björnsson hjá Tanna Travel.
Mynd 2: Landeigendur í kringum Stuðlagil, f.v.: Jakob Karlsson (Grund), Halla Eiríksdóttir (Hákonarstaðir og eigandi HAK Bistro), Hanna Katrín Friðriksson atvinnuvegaráðherra, Sigvaldi H. Ragnarsson (Hákonarstaðir og eigandi HAK Bistro) og Marteinn Óli Aðalsteinsson (Klaustursel).
Mikilvægt að ráðamenn komi á staðinn
Úr Neskaupstað lá leið ráðherra til Eskifjarðar þar sem hún heimsótti tvö rótgróin ferðaþjónustufyrirtæki, Mjóeyri og Tanna Travel. Þar gafst forsvarsfólki fyrirtækjanna tækifæri til að ræða stöðu ferðaþjónustunnar og koma sjónarmiðum sínum milliliðalaust á framfæri við ráðherra.
„Við erum þakklát fyrir að ráðherra hafi gefið sér tíma til að koma austur, hitta okkur og kynna sér starfsemi ferðaþjónustufyrirtækja á svæðinu. Ferðaþjónustan hefur verið mikið til umræðu að undanförnu og við höfum meðal annars lýst áhyggjum af auknum álögum á greinina. Slíkar kostnaðarhækkanir geta komið sérstaklega illa við fyrirtæki á landsbyggðinni. Við fengum tækifæri til að koma okkar sjónarmiðum skýrt á framfæri og taka samtalið. Það skiptir máli að ráðamenn komi á staðinn, hitti fólkið sem starfar í greininni og heyri milliliðalaust hvaða áhrif ákvarðanir hafa,“ sagði Sigfinnur Björnsson, sölu- og markaðsstjóri Tanna Travel.
Frá Eskifirði hélt ráðherra áfram um Austurland og heimsótti Vök Baths við Urriðavatn. Heimsókninni lauk síðan með fundi með landeigendum við Stuðlagil.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
