Uppbyggingarsjóður styður við sinfóníska tónlist
Frá stofnun hefur Sinfóníuhljómsveit Austurlands vaxið og dafnað. Styrkir Uppbyggingarsjóðs hafa gert metnaðarfull verkefni möguleg.
Sæktu um!Frá sjö hljóðfæraleikurum til sinfóníuhljómsveitar
Þetta byrjaði með sjö austfirskum hljóðfæraleikurum sem komu saman á Reyðarfirði vorið 2018. Átta árum síðar hefur Sinfóníuhljómsveit Austurlands fest sig í sessi í menningarlífi landshlutans og stendur fyrir metnaðarfullum tónlistarverkefnum. Uppbyggingarsjóður Austurlands hefur verið stærsti styrktaraðili hljómsveitarinnar og stuðningur hans skipt sköpum fyrir starfsemina.
Sinfóníuhljómsveit Austurlands var stofnuð 10. maí 2018 að frumkvæði Gillian Haworth, sem kallaði saman sjö austfirska hljóðfæraleikara til að hrinda hugmyndinni í framkvæmd.
„Við vorum öll mjög spennt fyrir hugmyndinni. Það sem helst hefur komið mér á óvart er hversu miklu okkur hefur tekist að áorka á tiltölulega skömmum tíma og hversu öflugt starf hefur byggst upp í kringum hljómsveitina,“ segir Sóley Þrastardóttir hjá Sinfóníuhljómsveit Austurlands.
Sérstakar áskoranir á Austurlandi
Að halda úti sinfóníuhljómsveit krefst umfangsmikils undirbúnings, skipulags og fjármögnunar. Á Austurlandi bætast við sérstakar áskoranir vegna þess að ekki eru allir þeir hljóðfæraleikarar sem þarf til staðar í landshlutanum. „Við þurfum að fá til liðs við okkur fjölda gestahljóðfæraleikara. Það kallar á aukið skipulag og hefur í för með sér töluverðan kostnað við ferðir og gistingu,“ segir Sóley.
Þrátt fyrir þessar áskoranir hefur hljómsveitin skapað tónlistarfólki á Austurlandi tækifæri til að taka þátt í flutningi stórra tónverka sem annars væri ekki mögulegt að flytja í landshlutanum. Starfsemin hefur jafnframt styrkt tengsl tónlistarfólks innan Austurlands og við tónlistarmenn annars staðar á landinu.
Stuðningur sem skiptir sköpum
Uppbyggingarsjóður Austurlands hefur gegnt mikilvægu hlutverki í starfsemi hljómsveitarinnar.
Sjóðurinn hefur styrkt verkefni hennar á undanförnum árum og að sögn Sóleyjar hefur sá stuðningur verið forsenda þess að hægt hafi verið að ráðast í metnaðarfull tónlistarverkefni.
„Uppbyggingarsjóður hefur hingað til verið stærsti styrktaraðili hljómsveitarinnar og stuðningur hans hefur skipt sköpum fyrir starfsemina.“
Sóley bendir á að kostnaður við tónleikahald af þessu tagi sé mikill, ekki síst vegna launa flytjenda og ferða- og gistikostnaðar gestahljóðfæraleikara.
„Styrkirnir hafa gert okkur kleift að ráðast í metnaðarfull verkefni og bjóða upp á sinfóníska tónlist á Austurlandi. Án þeirra væri starfsemi hljómsveitarinnar vart möguleg.“
Metnaðarfull verkefni fram undan
Fram undan er viðburðaríkt tímabil hjá Sinfóníuhljómsveit Austurlands. Um þessar mundir er hljómsveitin í samstarfi við Þjóðaróperu um sýninguna Undir sömu stjörnu, sem verður í Eskifjarðarkirkju 25. október næstkomandi.
Þann 18. apríl 2027 verða stórtónleikar þar sem frumflutt verður nýtt verk eftir Báru Sigurjónsdóttur, Horft til framtíðar. Á sömu tónleikum verður þriðja sinfónía Beethovens, Hetjusinfónían, flutt ásamt bassabásúnukonsert eftir Alexei Lebedev, þar sem Árni Pétur Árnason leikur einleik.
Í nóvember 2027 stefnir hljómsveitin síðan að samstarfi við Kór Seyðisfjarðarkirkju, Fjarðakórinn og Óperukór Austurlands um flutning á Messíasi eftir Händel.
Umsóknarfrestur rennur út 21. október
Uppbyggingarsjóður Austurlands styður við menningu, atvinnuþróun og nýsköpun í landshlutanum. Sjóðurinn hefur á undanförnum árum veitt fjölbreyttum verkefnum brautargengi, stutt við skapandi starf og frumkvæði íbúa og stuðlað að öflugra atvinnu- og menningarlífi á Austurlandi. Markmiðið er að efla samfélagið, skapa ný tækifæri og styðja við hugmyndir sem geta haft jákvæð áhrif til framtíðar.
Umsóknarfrestur vegna næstu úthlutunar rennur út 21. október klukkan 14.
Sæktu um!
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
