Háskólagrunnur að hefjast
Nemendur í Háskólagrunni HR mæta í skólann eftir næstu helgi í starfsstöð Austurbrúar á Reyðarfirði. Undirbúningur hefur gengið vel og nýverið var ráðinn verkefnastjóri uppbyggingar háskólanáms á Austurlandi sem mun halda utan um námið og nemendur þess.
Verkefnastjóri ráðinn
Bjarni Þór Haraldsson hefur verið ráðinn verkefnastjóri uppbyggingar háskólanáms á Austurlandi og hefur hann þegar hafið störf. Námið hefst 3. ágúst þegar kennsla hefst í Háskólagrunni HR sem er viðbót við stúdentsnám og undirbúningur undir frekara háskólanám.
Fyrsti áfanginn
Fyrsti áfangi í uppbyggingu háskólanáms á Austurlandi er Háskólagrunnur HR á Austurlandi en kennsla í honum hefst í ágúst. Sérstök áhersla er lögð á verk- og tækninám og er námið staðbundið með stafrænum lausnum en námsaðstaða verður í Fróðleiksmolanum á Reyðarfirði. Námið er samstarfsverkefni Háskólans í Reykjavík, Háskólans á Akureyri og Austurbrúar með stuðningi menntamálayfirvalda, sveitarfélaga og fyrirtækja á Austurlandi.
Víðtæk reynsla
Bjarni er með BSc. í tölvuverkfræði frá Álaborgarháskóla. Hann hefur starfað hjá Alcoa Fjarðaráli síðan 2009 sem tæknifræðingur á upplýsingatæknisviði. Þá hefur hann einnig starfað sem kerfisstjóri hjá Tölvusmiðjunni, sjómaður og sinnt kennslu við Menntaskólann á Egilsstöðum. Bjarni hefur einnig tekið að sér ýmis stjórnunarstörf, m.a. hjá HSA, Austra Brugghús og Jafnréttisnefnd Fljótsdalshéraðs. Bjarni á sér fjölmörg áhugamál, helst má nefna skotfimi þar sem hann hefur kennsluréttindi á endurhleðslu riffilskota, Crossfit, bjórbrugg, súrdeigsbakstur auk þess sem hann er fjölskyldumaður mikill.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
