Til að efla samfélag og byggð á Vopnafirði, þarf að fjölga ungu fólki á aldrinum 20 – 40 ára og auka fjölbreytni í atvinnulífi. Þetta voru helstu niðurstöður íbúaþings sem haldið var á Vopnafirði helgina 23. – 24. apríl.  Þátttaka fór fram úr björtustu vonum og um 80 manns sóttu þingið sem einkenndist af krafti og gleði. 

Með þinginu hófst byggðaþróunarverkefni sem Vopnafjarðarhreppur stendur að, í samstarfi við Byggðastofnun, Austurbú og íbúa.  Verkefnið mun standa að lágmarki í eitt ár og á þinginu hlaut það nafnið Veljum Vopnafjörð.  

Íbúar eiga sér draum um stækkun byggðar og fjölgun íbúa og atvinnutækifæra, m.a. fyrir háskólamenntaða.   Auka þarf framboð á íbúðarhúsnæði til leigu og atvinnuhúsnæði og huga að því í skipulagi og þá er þörf fyrir stækkun hjúkrunarheimilisins Sundabúðar.  Vopnafjörður er kjörlendi fyrir landbúnað, sem ætti að vera áfram ein af grunnstoðum byggðarinnar.  Hugmynd um hreindýraeldi og ræktun fékk góðan hljómgrunn. 

Margir eiga sér draum um nýja sundlaug inni í þorpinu og lögð var áhersla á góðar aðstæður til útivistar og gróðursælan og fallegan bæ og byggð.  Ýmsar hugmyndir komu fram um starfsemi og nýtingu á Kaupvangi, Minjasafninu Bustarfelli og félagsheimilinu Miklagarði.

Ferðaþjónusta er einn af vaxtarbroddunum til að auka fjölbreytni í atvinnulífi og voru tækifæri á því sviði rædd í nokkrum hópum m.a.  hugmynd um stóran útivistarratleik fyrir fólk hvaðanæva að úr heiminum. Málefni barna og unglinga voru rædd, t.d. um aukið samstarf grunnskóla og atvinnulífs og sumarstörf fyrir ungt fólk.