Miðvikudaginn 7. september kl. 16-18, Vonarlandi Egilsstöðum, verður kynning á norrænum menningarsjóðum. 

Norðurlöndin reka saman öflugt sjóðakerfi fyrir listir og menningu sem sífellt er verið að bæta, breyta og laga. Stærstu sjóðirnir eru Norræni menningarsjóðurinn (www.nordiskkulturfond.org) og Norræna menningargáttin (www.kulturkontaktnord.org). 

Til að sækja um fé í þessa sjóði þarf verkefnið að hafa sterka norræna tengingu. Næsti stóri umsóknarfrestur er 3. október og því tilvalið að sækja sér upplýsingar núna.

Ása Richardsdóttir, fyrrum forseti Leiklistarsamband Íslands og sendiherra Norræna menningarsjóðsins, fer yfir norræna sjóðakerfið og möguleika á samstarfi og tengingum.

Nýtið tækifærið og heyrið um þá styrkjamöguleika sem í boði eru

Allir velkomnir!

Ráðgjöf frá Ásu

Samtök, fyrirtæki og einstaklingar sem eru að vinna að norrænum umsóknum eða eru með skýra hugmynd að verkefni, geta óskað eftir einstaklingsráðgjöf hjá Ásu. Hún verður á Egilsstöðum 7. september milli 13 – 16. Þeir sem óska eftir slíkri ráðgjöf hafi beint samband við Ásu í gegnum netfangið [email protected]

Um Ásu

Ása Richardsdóttir hefur starfað í menningu, listum, stjórnmálum og fjölmiðlun í 30 ár. Hún byrjaði tvítug að vinna hjá RÚV og eftir fyrstu háskólagráðu starfaði hún sem fréttamaður erlendra frétta á Sjónvarpinu. Frá árinu 1994 hefur hún unnið í íslensku leikhúsi og dansi, stofnaði Kaffileikhúsið, var framkvæmdastjóri Íslenska dansflokksins og forseti Leiklistarsamband íslands. Hún hefur stýrt fjölmörgum alþjóðlegum viðburðum og verkefnum, bæði hér heima og erlendis og starfar nú sjálfstætt sem kennari, ráðgjafi og verkefnisstjóri í listum bæði hér heima og erlendis.