Nú í apríl er ár liðið frá íbúaþingi á Vopnafirði, sem markaði upphaf að verkefninu „Veljum Vopnafjörð“.  Austurbrú er bakhjarl verkefnisins ásamt Byggðastofnun, en það er leitt af Vopnafjarðarhreppi.

Skilaboð íbúa á þinginu voru dregin saman í þrjú orð: „Yngri, kraftmeiri og fjölbreyttari Vopnafjörður“.  Frá upphafi stóð til að verkefnið stæði í eitt ár og nú verður hringnum lokað með málþingi, fimmtudaginn 27. apríl, næstkomandi. 

Á málþinginu segja þrír ungir Vopnfirðingar frá sinni sýn á heimabyggðina.  Þau hafa öll farið að heiman til náms en ekki öll snúið til baka – að minnsta kosti ekki ennþá.  Þetta eru þau Konráð S. Guðjónsson, hagfræðingur í greiningardeild Arion banka, Egill Gautason, landbúnaðarfræðingur og Þuríður Björg W. Árnadóttir, mag.theol. nemi.  Einnig mun Margrét Gauja Magnúsdóttir, kennari og bæjarfulltrúi fjalla um lýðræðisvitund og valdeflingu ungs fólks.  Að erindum loknum verða umræður undir yfirskriftinni: „Yngri, kraftmeiri og fjölbreyttari Vopnafjörður – hvernig komumst við þangað?“ 

Á málþinginu mun Ólafur Áki Ragnarsson, sveitarstjóri, segja frá verkefninu og því sem unnið hefur verið að og setja byggðaþróun Vopnafjarðar í stærra samhengi.

Verkefnisstjórn hefur haft það að leiðarljósi að vinna með frumkvöðlum og sérstaklega með ungu fólki en þátttakendur á íbúaþinginu í fyrra forgangsröðuðu málefnum í lok þings og töldu fjölgun fólks á aldrinum 20 – 40 ára mikilvægasta þáttinn í eflingu byggðar. 

Yfirlit um þau skref sem stigin hafa verið í verkefninu er að finna í stefnuplaggi sem sjá má hér. 

Málþingið verður fimmtudaginn 27. apríl frá kl. 16 – 18.30 í Miklagarði og er dagskráin hér. 

Nánari upplýsingar um verkefnið má finna á vef Vopnafjarðarhrepps.