Austurbrú var að fá styrk upp á 1.000.000 kr. úr þróunarsjóði innflytjenda fyrir verkefnið „Innflytjendur á Austurlandi, aðlögun og upplifun“. Tilgangur rannsóknarinnar er að kanna stöðu innflytjenda á Austurlandi og út frá því meta núverandi verklag með það í huga að styðja við aðlögun innflytjenda að samfélaginu.

„Við teljum þetta mjög merkilegt og mikilvægt verkefni,“ segir Tinna Halldórsdóttir, félagsfræðingur og verkefnastjóri hjá Austurbrú. Markmið verkefnis er tvíþætt, annars vegar að kortleggja þá þjónustu og aðlögun sem innflytjendum mætir þegar þeir velja að búa og starfa á Austurlandi en í dag eru þeir um 900 talsins, eða tæp 10% íbúa Austurlands. Tilgangur rannsóknarinnar er að kanna stöðu innflytjenda á Austurlandi og út frá því meta núverandi verklag varðandi móttöku með það í huga að styðja við aðlögun innflytjenda að samfélaginu. 

„Það er ansi hátt hlutfall innflytjenda á Austurlandi en þetta er samt ekki mjög sýnilegur hópur að öðru leyti en því að hann sækir vinnu hérna,“ segir Tinna. „Við viljum skoða hvernig þessi hópur aðlagast og blandast inn í samfélagið og hvernig er tekið á móti þeim.“

Hvernig hyggist þið skoða þetta?

„Það er hægt að skoða þetta á ýmsa vegu,“ segir hún. „Við getum t.d. skoðað heimasíður hjá sveitarfélögum og helstu þjónustustofnunum. Eru þær t.d. á fleiri en einu tungumáli? Við getum skoðað þetta út frá skólunum. Hvernig er staðið að því að hjálpa fólki að viðhalda sínu eigin tungumáli? Það getur skipt sköpum um hvort fólk nái tökum á íslensku. Svo er hægt að skoða félagslega þætti: Er þessi hópur t.d. virkur í leikfélögum eða björgunarsveitinni svo eitthvað sé nefnt og á fólkið íslenska vini?“

Tinna mun stýra verkefninu af hálfu Austurbrúar en vinna við rannsóknina hefst á næstu dögum og lýkur í lok árs. „Auðvitað er verið að gera ýmislegt fyrir þennan hóp á Austurlandi,“ segir hún. „En vonandi kemur niðurstaða úr þessari rannsókn sem hægt er að nota til að lagfæra það sem betur má fara. Þá skiptir máli að svona rannsókn stuðli að auknu samtali í samfélaginu um þessi mál og að til sé einhver heildstæð mynd af því sem verið er að gera í þessum málum og því sem vantar upp á.“

Nánari upplýsingar um verkefnið veitir Tinna Halldórsdóttir // tinna (hja) austurbru.is // 857 0801