Austurbrú 5 ára: Hver erum við?

Í tilefni af fimm ára afmæli Austurbrúar fannst okkur viðeigandi að opna dyrnar upp á gátt og leyfa Austfirðingum, sem og landsmönnum öllum, að kynnast þessu frábæra fólki sem vinnur hjá okkur. Fyrsta viljum við kynna til leiks hana Elfu Hlín Pétursdóttur, framvörð okkar á Seyðisfirði og sú okkar sem er líklegust til að hafa lesið flestar ef ekki allar bækurnar eftir Halldór Kiljan.  

Fjölskylduhagir? Ég er í  sambúð með Tryggva Gunnarssyni og við eigum dóttur á öðru aldursári, hana Gunnhildi Jöru.

Aldur og fyrri störf? Er rúmlega 40 árum eldri en dóttirin. Hef starfað við allskonar, var safnstjóri á Minjasafni Austurlands, vann í landbúnaðarráðuneytinu, við þýðingar, á Skálanesi, komið að ferðaþjónustu með ýmsum hætti og á mínum yngri árum vann ég m.a. á kaffihúsi, í sjoppu, á sjúkrahúsinu á Seyðisfirði, í fiski og svo mætti áfram telja. Ég er hins vegar menntaður sagnfræðingur.

Helstu verkefni og hvaða máli skipta þau? Ég segi stundum að ég sé menningarbjúrókrat, er ekki listamaður sjálf en vinn með skapandi greinum á ýmsan hátt og reyni að gera mitt til að þær dafni og vaxi enda hef ég óbilandi trú á mikilvægi þeirra í okkar samfélagi.

Mitt stærsta verkefni í vinnunni er tengt Miðstöð menningarfræða á Seyðisfirði en henni er ætlað að styðja og styrkja menningarlíf á staðnum auk þess að stunda og stuðla að menningarfræðirannsóknum á Austurlandi. Ég kem að mjög fjölbreyttum verkefnum  innan hennar, m.a. hef ég umsjón með sumartónleikaröðinni Bláa kirkjan, vinn náið með Skaftfelli og Tækniminjasafninu, um þessar mundir hef ég umsjón með endurútgáfu á Húsasögu Seyðisfjarðar og tek einnig þátt í því að vinna að tillögu og greinargerð um að gera hluta af Seyðisfirði að verndarsvæði í byggð. Þá eru rannsóknir stór hluti af minni vinnu og þessa dagana er ég að setja saman banka af rannsóknarverkefnum sem ég ætla að reyna að selja háskólakennurum og -nemendum að taka upp á sína arma.

Þá er ég hluti af teyminu í kringum Áfangastaðinn Austurland og í öðrum hópi sem hefur með rannsóknastarf Austurbrúar að gera.

Hvað gerir þú í frítímanum þínum? Ég er í bæjarstjórn á Seyðisfirði þannig að minn frítími fer ansi mikið í störf því tengdu þessi misserin. En annars elska ég að ferðast og sjá nýja staði. Fátt betra líka en góður göngutúr í íslenskri náttúru, helst ef maður getur horft eftir fuglum líka og bóklestur hefur alltaf spilað stóran sess. Annars er ég mest að upplifa það að verða móðir á gamals aldri og þær (allt of fáu) lausu stundir sem ég á fara í að sinna því yndislega en oft jafnframt krefjandi hlutverki.

Hvað er Austurland í þínum huga? Þrjár setningar, takk. Á Austurlandi er falleg og yfirþyrmandi náttúra, há fjöll og djúpir firðir og áhugaverð saga sem næra sál og líkama. Austurland er land tækifæranna. Á Austurlandi þrífst óþarflega mikill hrepparígur. 

Í hvaða blóðflokk ertu? A-

Hvað varstu að gera fyrir þremur klukkustundum (viðtalið tekið klukkan hálf tíu að morgni á seyðfirskum staðartíma)? Ég var að skríða fram úr eftir að ég náði að sofna aðeins undir morgun, en dótturinni fannst upplagt að vakna fyrir klukkan fimm, aldrei þessu vant.  Móðurinni fannst það aðeins of snemmt.

Hvað gleður þig? Manngæska (og gráglettinn og stundum pínu nasty húmor).

Hvað gremur þig? Óheiðarleiki.

Sýndu okkur síðustu myndina sem tókst á símann þinn?

Sjónvarp eða bækur? Bækur alla daga, þó að sjónvarpið sé oft notað líka.

Finnst þér lifrarpylsa góð? Ef ekki, hvers vegna? Já, finnst hún góð, sérstaklega með hnausþykkum grjónagraut.

Ertu með einhvern ávana? Ég er með plokkmaníu, get ekki látið búkonuhárin á andlitinu á mér í friði (og líklegast stuðlað að ofvexti þeirra þess vegna).

Hefurðu komist að einhverju nýju um sjálfa þig nýverið? Ég er óþarflega hrædd við átök þannig að það sem er mikill kostur hjá mér, að vilja miðla málum og setja mig inn í sjónarmið annarra, er líka stór galli því ég stend ekki alltaf með sjálfri mér og því sem ég trúi á.

Að lokum: Er eitthvað sem þér finnst að aðrir ættu að vita um þig? Það er ekkert sérstakt sem kemur upp í hugann núna. Jú, ég dansa argentískan tangó og væri alveg til í góðan dansfélaga.