Hrönn Grímsdóttir er nýr starfsmaður hjá Austurbrú. Hún er ráðin í hálft starf sem náms- og starfsráðgjafi og verður með starfsstöð í Neskaupstað.

Verkefni Hrannar eru mörg og spennandi en hún mun fyrst og fremst þjónusta fullorðið fólk sem ekki hefur lokið formlegri menntun þótt vitaskuld séu allir velkomnir til hennar. „Fólk getur komið til að skoða hugsanlegar námsleiðir eða starfsval. Ég aðstoða við gerð ferilskrár, veiti ráðgjöf við markmiðasetningu ýmiskonar og einnig varðandi persónuleg málefni,“ segir Hrönn og bætir við: „Fólk getur einnig komið og tekið áhugasviðskönnun og fengið þjónustu vegna raunfærnimats.“

Hrönn er fædd og uppalin í Neskaupstað. Hún er gift Sveini Halldóri Oddssyni Zoëga og á með honum tvo drengi á aldrinum átta og tíu ára. Hún hefur starfað sem náms- og starfsráðgjafi hjá Verkmenntaskóla Austurlands og hefur jafnframt sinnt kennslu þar. Hún stofnaði fyrirtækið Hraustur fyrir þremur árum og þar hefur hún verið með jóga og líkamsræktartíma. Eins hefur Hrönn haldið fyrirlestra um heilsutengd málefni þar sem áherslan er ekki síður á andlega en líkamlega heilsu.

Hrönn lýsir sjálfri sér sem „eldhressri“ og oftast „óþolandi jákvæðri“. Hún nýtur þess að framkvæma, læra eitthvað nýtt, fara út fyrir þægindarammann og gera „eitthvað svolítið kjánalegt með reglulegu tímabili.“ Henni líst vel á nýja starfið, betur og betur með hverjum deginum sem líður. „Ég hlakka mikið til að hitta sem flesta við hin ýmsu tækifæri, á vinnustöðum, í viðtölum og á námskeiðum,“ segir þessi eldspræki nýi liðsmaður Austurbrúar.