Starfsmaðurinn okkar á Djúpavogi heitir Lilja Dögg Björgvinsdóttir og hóf hún störf hjá okkur fyrr á þessu ári. Meðal verkefna hjá henni er vinna við Sjálfbærniverkefnið og aðstoð við fjarnema.

Starfsstöð Lilju er Djúpið á Djúpavogi. Þar er salur sem hólfaður er niður með skilrúmum og fjöltengjum. Nemendur hafa því gott næði til að sinna sínu fjarnámi sem þeir stunda aðallega á kvöldin og um helgar. Þá sér Lilja einnig um prófatöku á Djúpavogi. Helsta verkefnið hennar er þó tengt Sjálfbærniverkefninu og hefur hún m.a. umsjón með uppfærslum á vef verkefnisins.

Lilja hefur lengst af starfað sem grunnskólakennari en hún er menntaður náttúrufræðikennari. „Ég hef kennt  hér á Djúpavogi,“ segir hún „Áður en ég kom hingað vann ég í garðyrkju – bæði á Suðurlandi og í Noregi. Ég starfa stundum sem leiðsögumaður í smærri ferðum í nágrenni Djúpavogs.“

Lilja er „fæddur Ólsari“ en hefur búið víða, í Vestmannaeyjum, Ölfusi, Hveragerði og svo lagði hún land undir fót og flutti með dóttur sína til Noregs og þar bjuggu þær í þrjú ár. Hún flutti aftur heim haustið 1999 og hefur búið á Djúpavogi alla tíð síðan með stuttum hléum. Hún er gift Sigurjóni Stefánssyni frá Brekku í Hróarstungu og eiga þau þrjú börn saman (fædd 2005 og svo tvíburar fæddir árið 2006) auk tveggja barnabarna. Þau reka Fiskmarkað Djúpavogs ásamt tveimur öðrum fjölskyldum og þar sér Lilja m.a. um bókhaldið.

Hún segist hafa mikla þörf til að ferðast en lýsir sér sem bæði freknóttri og fjarsýnni!

Henni líst vel á að vinna hjá Austurbrú. „Það er mikil tilbreyting að vera allt í einu mikið til ein í vinnunni frá því að vera á mjög fjölmennum vinnustað. Fólki fer þó fjölgandi í kringum mig hvort sem um ræðir nemendur eða smáfyrirtækjaeigendur. Ég hef mjög gaman af grúski í tölfræði tengt umhverfi og því les ég mér oft til ánægju í vinnunni tengt sjálfbærniverkefninu.“