Hallandi skilti, ónýtir kantsteinar, brotnar hellur og skortur á ruslafötum! Allt þetta og meira til finnum við í bænum okkar en erum ef til löngu hætt að taka eftir. Úrbótagöngu er ætlað að auka meðvitund okkar um þessa litlu galla sem auðvelt er að laga. Þegar hefur verið gengið á Egilsstöðum og á Borgarfirði eystri og núna á fimmtudaginn verður gengið á Vopnafirði. Sama dag verður vefurinn urbotaganga.is opnaður þar sem íbúar geta sent inn úrbótatillögur með lítilli fyrirhöfn.

Úrbótaganga er nýtt verkefni sem hefur verið hleypt af stokkunum á Austurlandi, fyrirmyndin kemur frá Svíþjóð en markmiðið er að bæta ásýnd landshlutans fyrir gesti og íbúa. Þetta er liður í áfangastaðaáætlun Austurlands, sem birt var í fyrra, og er samstarfsverkefni Austurbrúar og sveitarfélaganna á Austurlandi. Í sem skemmstu máli er úrbótaganga skipulögð ganga þar sem fólk skrásetur það sem betur má fara og kemur síðan ábendingunum til þess sem ber ábyrgð á að laga og/eða bæta. Tilgangurinn er að bæta ásýnd samfélagsins þannig að upplifun íbúa og gesta verði enn ánægjulegri.

„Þetta snýst um að benda á það sem auðvelt er að laga í umhverfinu og við hvetjum fólk til að leggja til úrbætur sem eru hófsamar og raunsæjar,“ segir María Hjálmarsdóttir, verkefnastjóri hjá Austurbrú, og bætir við að oftar en ekki sé tiltölulega auðvelt að taka til á atvinnulóðum, þökuleggja, gróðursetja eða rétta við hallandi götuskilti: „Það er margt sem íbúar geta gert sjálfir en annað sem þeir geta hvatt fyrirtæki, verktaka eða sveitarfélög til að framkvæma,“ segir hún.  

Þegar hefur verið farið í úrbótagöngu á Egilsstöðum og á Borgarfirði eystri en núna á fimmtudaginn, þann 27. júní, ætla Vopnfirðingar að ganga um bæinn sinn og koma með tillögur að úrbótum. Þeir ætla að hittast stundvíslega klukkan 16:00 í félagsheimilinu Miklagarði, skipta sér í þrjá hópa og ganga um bæinn. Að því loknu ætla göngumenn að hittast í Miklagarði og spjalla um niðurstöðurnar.

Sama dag og gengið er verður vefurinn Úrbótaganga.is opnaður þar sem fólk getur komið með ábendingar og tillögur án þess að fara í úrbótagöngu. „Sumir komast ekki í skipulagða göngu af einhverjum ástæðum,“ segir María. „Þess vegna settum við upp þennan vef sem er mjög notendavænn og auðvelt að senda inn tillögur að úrbótum. Fólk getur sett inn tillögur með símanum sínum t.d. í göngutúrnum hvenær sem er. Það von okkar að íbúar Austurlands taki vel á móti þessum vef.“

Hér má skrá sig í göngu á Vopnafirði.

Frekari upplýsingar fást hjá Austurbrú:
Kristjana Louise Friðbjarnardóttir (vegna göngunnar á Vopnafirði) // 847 4482 // [email protected]
María Hjálmarsdóttir // [email protected]