Vegna stöðunnar í samfélaginu hefur Austurbrú ákveðið að bjóða frían aðgang að rafrænum þjónustunámskeiðum. Með þessum hætti vill Austurbrú hvetja Austfirðinga til að nýta vel aukinn tíma sem óhjákvæmilega skapast í aðstæðum sem þessum.  

Um er að ræða námskeiðin „Móttaka gesta“ og „Austurland“ sem eru rafræn námskeið á íslensku og ensku. Þau hentar öllum sem taka á móti ferðamönnum á Austurlandi, t.d. á gisti- og veitingastöðum, í sundlaugum, verslunum og sjoppum. Það hentar nýliðum sérstaklega vel en getur líka eflt reyndara starfsfólk í starfi.

Móttaka gesta

Námskeiðið fjallar um hugtakið gestrisni og fagmennsku í móttöku gesta. Lögð er áhersla á að námsefnið sé hagnýtt og að það komi strax að notum fyrir starfsmanninn. Efninu er miðlað í gegnum sérhannaðan hugbúnað með texta, myndum og stuttum myndskeiðum. Námsefnið er brotið upp með reynslusögum austfirskra gestgjafa og nemandi þarf að þreyta próf í lok hvers kafla. Það tekur  um klukkustund að ljúka námskeiðinu.

> Skoða námskeið

Austurland

Námskeiðið „Austurland“ er afar gagnlegt fyrir þá sem þurfa að skerpa á þekkingu sinni á landshlutanum. Markmiðið er að veita nemendum inngang að því helsta sem Austurland getur boðið ferðamönnum. Fjallað er um einkenni samfélags og náttúru og sagt frá helstu áningastöðum, menningarhátíðum og möguleikum til afþreyingar.

> Skoða námskeið

Við hvetjum Austfirðinga til að nota tímann á meðan þessi faraldur geysar sem tækifæri til að fræðast um hluti sem oft verða útundan í amstri dagsins en eru engu að síður mikilvægir. Námskeiðin verða ókeypis til 1. maí.