Eins og fram hefur komið í fjölmiðlum hefur samgöngu- og sveitarstjórnarráðherra falið verkefnahópi að útfæra framkvæmd greiðsluþátttöku ríkisins í farmiðakaupum íbúa landsbyggðarinnar í innanlandsflugi. Þessi leið er að fyrirmynd skoskra stjórnvalda og því gjarnan nefnd „skoska leiðin“ í daglegu tali. Markmiðið er að styðja við landsbyggðina og bæta aðgengi hennar að miðlægri þjónustu á höfuðborgarsvæðinu.

Í hópnum situr m.a. Jóna Árný Þórðardóttir, framkvæmdastjóri Austurbrúar, fyrir hönd Sambands íslenskra sveitarfélaga:

„Það er ánægjulegt að sjá að barátta um skilning á mikilvægi flugs sem almenningssamgangna er að skila sér. Það er þó ýmislegt sem á eftir að vinna með og útfæra og mikilvægast að það sé gert með þarfir notenda í forgrunni.”

Úr frétt stjórnarráðsins um greiðsluþátttökuna:
„Greiðsluþátttaka mun takmarkast við ferðir sem farnar eru í einkaerindum og á eigin kostnað umsækjanda. Miðað skal við tiltekinn fjölda ferða á mann á ári og hámarkskostnað á ferð. Í leiðbeiningum til hópsins er gert ráð fyrir 40% greiðsluþátttöku ríkisins. Stefnt er að því að greiðsluþátttaka hefjist 1. september 2020 og til ársloka verði hægt að nýta niðurgreiðslu í einni ferð fram og til baka. Frá og með 1. janúar 2021 skuli greiðsluþátttaka miðast við þrjár ferðir fram og til baka.