Að gefnu tilefni biðjum við alla sem sækja Stuðlagil heim að sýna varkárni og muna að þeir eru á eigin ábyrgð á svæðinu. Þá er rétt að ítreka að því fylgir ábyrgð að birta myndskeið af áhættuhegðun við ána, s.s. af fólki að stökkva af klettum í gilinu eða leggjast til sunds í Jöklu, eins og nýleg dæmi eru um.
Jónas Guðmundsson, hjá Slysavarnarfélaginu Landsbjörgu, segir það mikið ábyrgðarleysi þegar áhrifavaldar á samfélagsmiðlum, með þúsundir fylgjenda, birta slíkar myndir. Með því sé verið að hvetja aðra gesti, sem hafa mögulega ekki sömu getu til að bjarga sér í erfiðum aðstæðum og vanir sundmenn, til svipaðs athæfis. „Við höfum séð svona myndir margoft og í mínum huga er þetta algerlega fráleit hegðun og vanvirðing við náttúruna,“ segir Jónas og bætir við: „Jökla er jökulá og getur verið mjög straumhörð, jafnvel þótt ekki séu sýnilegir vatnavextir í henni. Straumar í henni geta verið óútreiknanlegir og það geta auðveldlega skapast aðstæður sem reynast sundfólki lífshættulegar.“
Austurbrú hefur m.a. umsýslu með ferðavefnum VisitAusturland.is sem þúsundir ferðamanna nýta sér á ferðalögum um svæðið. Við tökum heilshugar undir orð Jónasar og hvetjum gesti okkar eindregið til að leggjast ekki til sunds í ánni né stökkva í hana af klettunum í kring. Að auki minnum við á að steinar og klettar á árbakkanum geta orðið hálir og það er auðvelt að hrasa á þeim og slasa sig.
Sýnum varkárni á ferðalögum og berum virðingu fyrir náttúrunni.
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn