Nýverið opnaði Austurbrú upplýsingavef um matvælaframleiðendur á Austurlandi, veitinga- og söluaðila, matarmarkaði og alla þá aðila á Austurlandi sem aðkomu hafa að framleiðslu og framreiðslu matar í landshlutanum.
Forsaga málsins er sú að vorið 2019 sótti Austurbrú um styrk í Matarauð Íslands, sem vinnur að því m.a. að draga fram sérstöðu íslensks hráefnis og matarmenningar, fyrir verkefni sem kallast Matarauður Austurlands. Tilgangur þess var m.a. að útbúa hráefnahandbók þar sem finna mætti upplýsingar um alla framleiðendur og söluaðila matvæla á Austurlandi. Upphaflega stóð til að gefa upplýsingarnar út í prentuðu formi en á seinni stigum gagnasöfnunar var ákveðið að útbúa frekar heimasíðu þar sem auðvelt væri að uppfæra upplýsingarnar, bæta við og breyta, auk þess sem aðgengi væri betra.
Vefurinn samræmist áherslum sem lagðar hafa verið til grundvallar í áfangastaðaáætlun Austurlands og sóknaráætlun landshlutans þar sem unnið er út frá gildum um sjálfbærni, umhverfisvitund og umhverfisvirðingu. Þá er verkefnið sem slíkt liður í byggðaþróun og tengist byggðaáætlun m.a. með því að stuðla að sjálfbærri þróun byggðarlaga, auðga atvinnulíf, sporna við fólksfækkun og jafna tækifæri m.a. til atvinnu og þjónustu.
Framsetning efnis er afar aðgengileg og skýr. Á vefnum er hægt að velja fjóra flokka: Veitingastaðir, framleiðendur, sögur af mat og matarmarkaðir. Þegar „Veitingastaðir“ og „Framleiðendur“ eru valdir getur notandi leitað á síðunni eftir flokki, staðsetningu og árstíð. Inni á síðunni eru grunnupplýsingar um þá sem búið er að skrá, heimilisfang, símanúmer, netfang og slóð á heimasíður og samfélagsmiðla.
Halldóra Dröfn Hafþórsdóttir er verkefnastjóri Matarauðs Austurlands. Hún segist afar ánægð með að vefurinn sé kominn í loftið og treystir á viðbrögð notenda í áframhaldandi þróun síðunnar.
„Skammtímamarkmiðin eru helst þau að sem flestir rýni síðuna með okkur og sendi okkur uppbyggilegar ábendingar um það sem betur má fara, t.d. hverjir ættu heima þarna inni, sem eru ekki nú þegar komnir, hvort fyrirtæki sé rétt flokkuð, textinn á síðunni og annað slíkt,“ segir hún og heldur áfram:
„Langtímamarkmiðin eru þau að vefurinn verði alltaf lifandi og uppfærður með nýjustu upplýsingum hverju sinni og að þarna inni verði hægt að finna alla á Austurlandi sem hafa aðkomu að mat og matarmenningu á svæðinu.“ Þannig eiga íbúar á svæðinu og þeir góðu gestir sem okkur sækja heim að geta fundið þær upplýsingar sem þá vantar, t.d. um veitingastaði, matvöruverslanir, matarmarkaði og annað í þeim dúr. Þá væri gagnlegt ef hægt væri að þýða upplýsingarnar yfir á annað tungumál en það mun líklega ekki gerast á næstunni.“
„Þessar upplýsingar eiga erindi við okkur öll,“ svarar Dóra aðspurð um fyrir hverja síðan sé hugsuð. Hann sé fyrir framleiðendur og söluaðila, áhugafólk um mat, neytendur, íbúa og gesti. „Ég vona svo sannarlega að íbúar svæðisins noti hann og bendi gestum og gangandi á hann. Ég vona líka að það muni þykja eftirsóknarvert að vera þarna inni, að þetta verði vettvangur fyrir fólk og fyrirtæki til að koma sér á framfæri,“ segir hún
Halldóra ítrekar að síðan og gagnabankinn séu enn í mótun: „Við viljum sjá fleiri flokka þarna inni. Við viljum hafa matarmarkaði á svæðinu, viljum upplýsa um þá framleiðendur sem einnig eru þátttakendur í Beint frá býli, hverjir eru í Samtökum smáframleiðenda matvæla og fleira,“ segir hún en annað megin markmið verkefnisins Matarauður Austurlands er að koma austfirskum vörum inn í allar matvöruverslanir á svæðinu og yrði vefurinn notaður til að veita upplýsingar um þær vörur.
Mannlegi þátturinn á Rás 1 hafði samband við Rán Freysdóttur þriðjudaginn 17. febrúar. Hún rekur veitingastaðinn Við Voginn á Djúpavogi þar sem hún er fædd og uppalin. Hún lærði innanhúsarkitektúr í Bandaríkjunum, Ítalíu og Þýskalandi, flutti heim eftir tíu ár erlendis og stofnaði hönnunarfyrirtæki fyrir austan sem hefur unnið fjölmörg verkefni en endaði svo með því að kaupa veitingastað, sem hún rekur í dag. Á honum er nær eingöngu boðið upp á mat úr héraði og nú er hún ein af þeim sem tengist verkefninu Matarauður Austurlands.
HlustaFrá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn