Hlýjar og góðar móttökur
„Oft á tíðum fylgir mikið stress við það eitt að mæta á prófstað. Nemendur eru eðlilega stundum stressaðir og kvíðnir í svona aðstæðum. Þá er mikilvægt að þeir fái hlýjar og góðar móttökur hjá okkur“ – segir Jóhann Björn Sigurgeirsson, verkefnastjóri prófa hjá Austurbrú.
723 próf á starfsstöðvum Austurbrúar
Á árinu 2023 voru tekin 723 próf á starfstöðvum Austurbrúar. Af þeim voru flest prófin tekin á Reyðarfirði eða um 45% allra prófa og 30% á Egilsstöðum. Verkefnastjóri prófaumsýslu hjá Austurbrú segir það mikið metnaðarmál hjá stofnuninni að gera starfsstöðvar sínar að heppilegum próftökustöðum þar sem nemendum líður vel og að bæði foreldrar og nemendur séu þakklát þessari þjónustu enda sparar hún bæði peninga og fyrirhöfn fyrir íbúa landsbyggðarinnar.
Á vorönn 2023 voru alls 178 próftakar sem tóku 330 próf hjá Austurbrú og á haustönn voru próftakarnir 179 talsins og prófin 393. Austurbrú heldur utan um og skráir fjölda prófa og próftaka en prófaumsýsla hefur verið umfangsmikil í starfi Austurbrúar undanfarin og prófatörnin lengist sífellt.
Myndin sýnir fjölda prófa eftir starfsstöðvum á árinu 2023.
Umfangsmikið verkefni
Nemendum sem taka próf á starfsstöðvum Austurbrúar þarf að sinna eftir formlegu verklagi um meðhöndlun prófa. Prófstaðir Austurbrúar eru sjö á Austurlandi. Próftakar eru flestir háskólanemendur en árið 2023 sá Austurbrú einnig um fyrirlögn prófa fyrir Umhverfisstofnun í veiði- og skotvopnaprófum og vinnuvélaprófum. Þá hafa framhaldsskólanemendur tekið próf á þeim starfsstöðvum Austurbrúar þar sem ekki er framhaldsskóli. Austurbrú sér einnig um að leggja fyrir búsetuleyfispróf í íslensku fyrir útlendinga í samstarfi við Mími – símenntun. Og þá fer jafnframt fram fyrirlögn ríkisborgaraprófa á Austurlandi á hverju vori á starfsstöð okkar á Egilsstöðum og hefur Austurbrú séð um þau próf í landshlutanum í samvinnu við Mími og Menntamálastofnun.
Viljum skapa gott andrúmsloft
Jóhann Björn Sigurgeirsson heldur utan um próftökur hjá Austurbrú. Hann segir talsvert lagt upp úr því að skapa gott andrúmsloft á starfsstöðvum Austurbrúar á meðan prófatíðin gengur yfir.
„Við reynum að tryggja óþarfa umgang og hávaða eins og kostur er. Látum starfsmenn okkar vita að það séu próf í gangi og allir sýni því skilning. Við merkjum stofurnar vandlega þar sem prófin fara fram og við inngang starfsstöðvanna svo starfsfólk og gestir sýni tillitssemi. Við reynum líka að vera dugleg að leiðbeina nemendum, fylgja þeim í réttar stofur og stappa í þá stálinu ef þess þarf.“
Verður þú var við mikið stress hjá nemendum? Heldurðu að það sé á einhvern hátt auðveldara að taka próf í heimabyggð?
„Oft á tíðum fylgir mikið stress við það eitt að mæta á prófstað,“ segir Jóhann. „Nemendur eru eðlilega stundum stressaðir og kvíðnir í svona aðstæðum. Þá er mikilvægt að þeir fái hlýjar og góðar móttökur hjá okkur. Ég vona að það sé upplifun nemenda að það sé að minnsta kosti jafn gott að taka próf hjá okkur eins og hjá skólunum.“
Er fólk ánægt með þessa þjónustu?
„Já, ég myndi telja það. Að geta tekið prófin í sinni heimabyggð fylgir bæði tíma- og peningasparnaður fyrir nemendur og fjölskyldur þeirra en nemendur geta valið um sjö starfsstöðvar til að taka prófin sín. Fólk er þakklátt þjónustunni sem við veitum enda er hún ekki sjálfsögð. Ég fæ allavega mörg hrós frá foreldrum og nemendum!“
Í hverju er þín vinna fólgin?
„Mín vinna er fólgin í því að skipuleggja og stýra prófunum á öllum sjö starfstöðvum Austurbrúar, frá Vopnafirði suður á Djúpavog. Próftakarnir okkar eru flestir háskólanemendur en við sjáum einnig um fyrirlögn prófa fyrir Umhverfisstofnun í veiði- og skotvopnaprófum og vinnuvélaprófum. Umsýslunni fylgir formlegt verklag um meðhöndlun prófa, meðferð persónugreinanlegra gagna og fleira. Þetta getur verið krefjandi vinna en hún er líka skemmtileg. Ég fæ mikið hrós og það er auðvitað gefandi. Hrós eru vanmetið verkfæri sem við Íslendingar ættum að vera duglegri að nota,“ segir Jóhann Björn en núna um miðjan janúar lýkur sjúkra- og upptökuprófum og þá fer að róast um hjá honum og önnur verkefni taka við í bili. Eða þar til næsta törn hefst með miðannarprófum, skot- og veiðikortaprófum auk annarra tilfallandi prófa og verkefna.
Nánari upplýsingar
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
