Um þessar mundir er mikill fjöldi nemenda á námskeiðum í tengslum við námskrár frá Fræðslumiðstöð atvinnulífsins í Fróðleiksmolanum á Reyðarfirði.  

Um er að ræða þrjár námsbrautir sem byggðar eru á námsskrám frá Fræðslumiðstöðinni. Í fyrsta lagi stóriðjuskóli Alcoa Fjarðaáls en þar eru um 50 nemendur í þremur hópum. Í öðru lagi eru 15 nemendur frá hjúkrunarheimilunum Uppsölum á Fáskrúðsfirði og Hulduhlíð á Eskifirði á fagnámskeiði fyrir starfsfólk í félags- og heilbrigðistþjónustu. Að lokum má svo nefna að 10 nemendur eru skráðir í Landnemaskólann.

Alls eru þetta 75 nemendur og má með sanni segja að það sé líf og fjör í Fróðleiksmolanum þessar vikurnar en reiknað er með að nemendur ljúki námi í lok árs. Þetta eru fjölbreyttar námsleiðir: Stóriðjuskólinn er ætlaður starfsmönnum fyrirtækja þar sem bræðsluofnar eða rafgreiningarker eru burðarásar í framleiðslunni. Í nokkur ár hefur Austurbrú tekið að sér að skipuleggja nám fyrir starfsmenn álversins á Reyðarfirði og nokkir tugir starfsmanna hafa nú þegar útskrifast. Á fagnámskeiðum fyrir starfsfólk hjúkrunarheimila lærir fólk ýmislegt sem gagnast í starfi s.s. skyndihjálp, næringarfræði, áfallahjálp og fleira. Í landnemaskólanum læra síðan innflytjendur íslensku en einnig almennt um íslenskt samfélag, hefðir, siði og menningu.

Kjartan Glúmur Kjartansson, verkefnastjóri hjá Austurbrú og stöðvarstjóri í Fróðleiksmolanum, segir svona umsvif þýðingarmikil. „Það er gott fyrir Austurbrú að fá alla þessa nemendur inn í húsið svo maður tali nú ekki um kennarana sem við þurfum að ráða til að sinna þessum verkefnum. En mest gildi hefur þetta fyrir okkar nemendur sem margir hverjir eru að setjast á skólabekk í fyrsta skipti í langan tíma. Að gefa fólki slíkt tækifæri er einn megintilgangur stofnunar eins og Austurbrúar,“ segir Kjartan Glúmur.