Þann 16. júní var rúmum sjö milljónum króna úthlutað úr frumkvæðissjóði Betri Borgarfjarðar til 16 samfélagseflandi verkefna
Alls bárust 22 umsóknir í sjóðinn frá 13 konum og 6 körlum og er er það í fyrsta sinn á verkefnistímanum sem konur eru meirihluti umsækjenda. Áætlaður heildarkostnaður verkefna er tæplega 33 m.kr. en sótt var um styrki fyrir rúmlega 19 m.kr. Styrkirnir eru hluti af verkefni Byggðastofnunar, Brothættar byggðir, sem starfrækt hefur verið á Borgarfirði eystra frá vordögum 2018. Er þetta fjórða og síðasta úthlutun verkefnisins.
Verkefnið Brothættar byggðir miðar að víðtæku samráði og að virkja þekkingu og getu íbúa byggðarlaga til að móta framtíðarsýn, markmið og lausnir. Enn fremur að virkja frumkvæði og samtakamátt íbúa og auka vitund þeirra um eigin þátt í þróun samfélagsins.
Á framkvæmdatíma verkefnisins (2018-2021) hefur samtals 34.570.000 kr. verið úthlutað.
Verkefnin sem hlutu styrki eru að vanda fjölbreytt og verður spennandi að fylgjast með framgangi þeirra. Hæsta styrkinn að þessu sinni hlýtur Blábjörg ehf., samtals 1,6 m.kr. Eigendur Blábjarga hafa samhliða hótelrekstri og endurbyggingu gamla Kaupfélagsins á Borgarfirði stofnað KHB Brugghús og hyggja þar á framleiðslu á borgfirskum bjór. Fyrirtækið framleiðir nú þegar landa og gin við góðan orðstír. Þá eru ýmis konar menningar- og listaverkefni einnig áberandi í þessari úthlutun.
Formleg úthlutunarathöfn fór fram í Hafnarhúsinu á Borgarfirði eystra. Segja má að athöfnin hafi verið fámenn en góðmenn þar sem veður setti strik í reikninginn en tveir styrkþegar lentu í hrakningum á Vatnsskarði eystra þar sem snjóaði hressilega þetta sumardagssíðdegi. Allir komust þó á leiðarenda.
Signý Ormarsdóttir, yfirverkefnastjóri hjá Austurbrú og stjórnarkona í verkefnisstjórn Betri Borgarfjarðar, hélt stutta tölu við athöfnina þar sem hún rifjaði m.a. upp kraftmikinn upphafspunkt verkefnisins, veturinn 2018, og áhrif verkefnisins og dugnað íbúa og styrkþega til þessa.
Nafn umsækjanda | Nafn verkefnis | Styrkupphæð | |
Já sæll ehf / Bryndís Snjólfsdóttir & Eyrún Hrefna Helgadóttir | Lindarbakki – viðburðaröð sumarið 2021 | 450.000 | |
Helgi Hlynur Ásgrímsson | Kjólsvík | 400.000 | |
Kata Sumegi | Waves Project | 250.000 | |
Ungmennafélag Borgarfjarðar | Slóðavél fyrir gönguskíðaiðkun | 250.000 | |
Christer Magnusson | Púttvöllur | 160.000 | |
Guðrún Benónýsdóttir | Sýningaröð í Glettu | 500.000 | |
Elín Elísabet Einarsdóttir | Hótel Nýlundabúðin | 700.000 | |
Minjasafn Austurlands | Skráning muna á Lindarbakka (II) | 500.000 | |
Blábjörg ehf. | Hönnun umbúða fyrir bjórframleiðslu | 600.000 | |
Elsa Katrín Ólafsdóttir | Afkomendur Borgarfjarðar | 700.000 | |
Blábjörg ehf. | Dósavél | 1.000.000 | |
Aldís Fjóla Borgfjörð Ásgeirsdóttir | Lagasmíðar á Borgarfirði eystra | 400.000 | |
Gusa ehf. | Minnkuð matarsóun | 500.000 | |
Elísabet Dögg Sveinsdóttir | Nuddstofa | 320.000 | |
Lindsey Lee | Innileikvöllur | 120.000 | |
Hafþór Snjólfur Helgason | Sýndarferðalag um gamla Borgarfjarðarhrepp | 500.000 | |
7.350.000 ISK |
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn