Hugur og bjartsýni
„Þetta skipti sköpum á Breiðdalsvík á sínum tíma. Það varð alger viðsnúningur á skömmum tíma. Það var hugur í fólki, bjartsýni og í slíku andrúmslofti verða ný tækifæri til“ – Elís Pétur Elísson, einn stofnenda Beljanda brugghúss um verkefnið Brothættar byggðir.
Ekki gleyma tilganginum
Austurbrú er stolt af því að aðstoða skapandi fólk á Austurlandi og greiða götu þess eins og hún best getur. Frumkvöðlar eru þó ávallt drifnir áfram af innri þörf til að skapa ný tækifæri fyrir sig sjálfa og ef vel gengur fyrir aðra.
Vaxandi fyrirtæki
Það má tína til ótal dæmi í atvinnusögu Austurlands þar sem ein manneskja hrindir af stað atburðarás sem síðan vindur upp á sig svo um munar. Brugghúsið Beljandi á Breiðdalsvík er ein slík saga en fyrirtækið er vaxandi á sviði bjórframleiðslu á Íslandi og hefur vakið athygli á landsvísu fyrir vandaða vöru.
Nánar
Hefðum látið slag standa
„Við stofnuðum fyrirtækið yfir viskíglasi, við Daði Hrafnkelsson, að loknum hreindýraveiðum,“ segir Elís Pétur Elísson, annar stofnenda Beljanda. „Við erum báðir frá Breiðdalsvík, Daði var í tannlækningum í Danmörku og ég var í útgerð heima. Við vorum bara, eins og gengur, að spjalla saman um hvað væri hægt að gera til að efla atvinnulífið í bænum og þetta var niðurstaðan,“ segir hann en fyrirtækið var stofnað formlega þann 17. júní árið 2017.
Fyrirtækið skapar eitt til tvö störf á veturna og fjögur á sumrin en meðfram brugghúsinu er rekin bar og samkomustaður á sumrin sem ber nafn fyrirtækisins Beljandi brugghús.
„Við höfum notið góðs af styrkjum frá Uppbyggingarsjóði Austurlands og við fengum stofnstyrk í gegnum verkefnið Brohættar byggðir sem þá var í gangi á Breiðdalsvík. Þessi aðstoð léttir undir þótt þeir séu auðvitað ekkert make or break fyrir okkur. Við hefðum látið slag standa og fundið leiðir óháð þessari aðstoð þótt við kunnum auðvitað að meta hana.“
Brothættar byggðir mikilvægar
Elís segist fagna því að Stöðvarfjörður sé orðinn hluti af verkefni Brothættra byggða. „Þetta skipti sköpum á Breiðdalsvík á sínum tíma,“ segir hann. „Það varð alger viðsnúningur á skömmum tíma. Það var hugur í fólki, bjartsýni og í slíku andrúmslofti verða ný tækifæri til. En það sem skiptir mestu máli er eftirfylgnin og að stofnum eins og Austurbrú fylgist með þörfum samfélagsins,“ segir Elís og bætir við að lokum: „Ég hvet ykkur til að vera sýnilegri um allt Austurland og ekki gleyma tilganginum sem er sá að þjóna fólkinu á svæðinu. Til að sinna atvinnuþróunarhlutverki sínu þarf Austurbrú sífellt að spyrja fólkið sem býr hérna: Hvernig getum við hjálpað?“
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
