Barnamenning blómstrar á Austurlandi
Fimmta BRAS-hátíðin verður haldin í haust undir yfirskriftinni „Ég um mig frá mér til þín“.
Heimasíða BRASBarnamenningarsjóður styrkir BRAS
BRAS – menningarhátíð barna og ungmenna á Austurlandi fékk úthlutaðar 4 milljónir króna úr Barnamenningarsjóði á dögunum. Fjármagnið kemur til góðra nota en fimmta BRAS-hátíðin verður haldin í haust undir yfirskriftinni „Ég um mig frá mér til þín“. Megináherslan í ár er á sjálfsmynd ungs fólks og hvernig þau geta verið þau sjálf í samskiptum við aðra.
Úthlutunarathöfnin fór fram þann 29. maí sl., á „Degi barnsins“. Barnamenningarsjóður hefur það hlutverk að fjármagna og styðja við fjölbreytta starfsemi á sviði barnamenningar með áherslu á sköpun, listir og virka þátttöku barna í menningarlífi. Úthlutunin fór fram í skála Alþingishússins undir stjórn Kolbrúnar Halldórsdóttur, formanns sjóðsins, og var athöfnin einkar hátíðleg.
Frétt um úthlutun á vef Rannís
Þýðingarmikill styrkur
Halldóra Dröfn Hafþórsdóttir, verkefnastjóri BRAS, segir að styrkurinn skipti hátíðina miklu máli en BRAS-hátíðin var fyrst haldin á Austurlandi haustið 2018 og hefur verið haldin á hverju hausti síðan þá. „Með styrknum er okkur gert kleift að halda áfram að bjóða börnum og ungmennum á Austurlandi uppá fjölbreytta list- og menningarviðburði þar sem áhersla er lögð á að vinna með menntuðum listamönnum. Mikið er lagt upp úr fjölbreytni í listformum og að aðgengi allra barna og ungmenna sé tryggt, óháð búsetu og efnahag,“ segir Halldóra.
„Ég um mig frá mér til ÞÍN“
Yfirskrift hátíðarinnar í ár er „Ég um mig frá mér til ÞÍN“ þar sem hugað verður sérstaklega að sjálfsmynd ungs fólks og hvernig þau sjá sig í samskiptum og samneyti við aðra. Áfram verður unnið í samstarfi við fjölmarga aðila en menningarmiðstöðvarnar á Austurlandi gegna lykilhlutverki ásamt öllum skólastigum og tónlistarskólum. Þá munu ýmsar stofnanir koma að hátíðinni eins og síðustu ár.
Stýrihópur BRAS, sem í sitja aðilar forstöðumenn menningarmiðstöðvanna þriggja, fulltrúar sveitarfélaga, fulltrúar stofnana og Austurbrúar er nú að undirbúa hátíðina sem fer fram í haust. Í ár verður sérstök áhersla lögð á að vinna með austfirskum listamönnum sem munu bjóða uppá gjörninga, viðburði, smiðjur og ýmislegt fleira skemmtilegt fyrir alla aldurshópa. Foreldrar eru hvattir til að fylgjast vel með en reynt verður að bjóða uppá viðburði í flestum byggðakjörnum. Þá verður áfram samstarf við „List fyrir alla“ en í ár verður öllum grunnskólanemendum boðið að taka þátt í viðburðinum „Ein stór fjölskylda“ með þeim Gunna og Felix.
BRAS-hátíðin hefur fest sig í sessi og er orðin stærsti samfelldi menningarviðburðurinn sem börnum og ungmennum á Austurlandi stendur til boða.
Nánari upplýsingar
Halldóra Dröfn Hafþórsdóttir
Signý Ormarsdóttir
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
