Austurlandsdeild Norræna félagsins á Íslandi stofnuð
Í vikunni var boðað til fundar á vegum Austurbrúar með það í huga að stofna deild Norræna félagsins á Austurlandi. Nokkuð er síðan deildir sem störfuðu áður á Austurlandi lögðust niður og nú var talinn tími til að kanna áhuga á því að endurvekja deild hér eystra.
Það kom skemmtilega á óvart hversu margir mættu og hvað áhuginn var mikill. Gestir fundarins komu víða að á Austurlandi auk þess höfðu nokkrir, sem áttu ekki heimangengt, samband og báðu um að þeir yrðu skráðir í félagið.
Mikilvægi norræns samstarfs
Hrannar Björn Arnarsson, formaður Norræna félagsins á Íslandi, ræddi mikilvægi norræns samstarfs og Ásdís Eva Hannesdóttir framkvæmdastjóri fór yfir starfsemi félagsins. Hrannar fór yfir sögu Norræna félagsins en félagið er einmitt 100 ára í ár. Hrannar ræddi meðal annars mikilvægi norræns samstarfs í þeirri stöðu sem nú er í Evrópu og minnti á að þegar samstarfið hófst fyrir 100 árum hefði ekki verið svo kært með norrænum þjóðum. Okkur þætti norrænt samstarf sjálfsagt en það væri í raun ekki svo. Einnig kom Hrannar inn á það að gagnlegt væri og áhugavert að koma á sameiginlegum norrænum ríkisborgararétti.
Starfsemin kynnt
Ásdís Eva var með kveðjur frá starfsmönnum ákveðinna verkefna sem unnin eru af Norræna félaginu svo sem Nordjobb og Snorraverkefnið. Báðir verkefnastjórar þessara verkefna vilja kynna starfsemina fyrir Austfirðingum og kemur ný deild félagsins hér á Austurlandi til með að skipta miklu máli í slíkri tengingu og upplýsingagjöf.
Stjórn kjörin
Ný stjórn var kjörin og mikill áhugi á því að vera í stjórninni. Í stjórn eru: Gabríel Arnarsson, Kenneth P.B. Sveningsen, Halla Eiríksdóttir, Dánjal Salberg Adleersson, Signý Ormarsdóttir og varamaður Egill Thorlacius.
Áfram eru að sjálfsögðu öll velkomin í deild okkar hér á Austurlandi og miklar væntingar til öflugs samstarfs á næstu misserum.
Upplýsingar um Norræna félagið
Nánari upplýsingar:
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
