Mikill áhugi hjá þýskum ferðaskrifstofum
Mikill áhugi er hjá þýskum ferðaskrifstofum á beinu flugi til Egilsstaða sem þýska flugfélagið Condor hefur í maí. Þetta á bæði við skrifstofur sem hafa um árabil selt ferðir til Íslands, en líka þær sem hafa sérhæft sig í klæðskerasniðnum ferðum á norðurslóðir.
Mynd til vinstri: Jóna Árný Þórðardóttir, framkvæmdastjóri Austurbrúar, heldur ræðu í sendiráðinu í Berlín þar sem hún kynnir áfangastaðinn Austurland.
Jóna Árný átti nú í desember fundi í Þýskalandi með fjölda ferðaskrifstofa, Condor og öðrum hagaðilum til að kynna áfangastaðinn Austurland í tengslum við beina flugið. „Við leggjum á það höfuðáherslu að Austurland sé falinn gimsteinn fyrir þá sem ferðast um Ísland. Við viljum ekki aðeins fá ferðafólk til okkar í gegnum þessa nýju leið inn í landið, heldur leggjum við mikið upp úr því að það fari sér hægt og njóti þess sem Austurland hefur upp á að bjóða,“ segir hún. Jóna átti fundi með sjö ferðaskrifstofum, fundaði með Condor og ræddi við aðra aðila sem áhuga hafa á fluginu, svo sem hið öfluga net áhugafólks um íslenska hestinn í Þýskalandi. Jóna Árný lét ekki þar við sitja, heldur nýtti líka tækifærið á árlegum upplestri á Aðventu Gunnars Gunnarssonar í sendiráði Íslands í Þýskalandi, og á tónleikum Svavars Knúts á sama stað, til að kynna Austurland fyrir um 400 gestum, þar af um 50 blaðamönnum.
Kynningarstarfið er langhlaup
Jóna segir áhugann á því að kynnast Austurlandi mikinn en að mikilvægt sé að fylgja eftir ákvörðun Condor um að fljúga vikulega til Egilsstaða eftir til að tryggja að flugið festist í sessi. Ferðaskrifstofur vinni langt fram í tímann og því sé kynningarstarfið langhlaup. „Það skiptir okkur Austfirðinga miklu að vel takist til með flugið, ekki aðeins til að fá hingað fleiri ferðamenn, heldur megum við ekki gleyma að með þessu opnast gátt fyrir okkur út í heim,“ segir hún og heldur áfram: „Frankfurt er einn af stærstu flugvöllum Evrópu og þangað er flogið til nærri 300 áfangastaða um heim allan. Þetta ættum við að nýta okkur, og skjóta þannig enn styrkari stoðum undir þetta flug, sem ég vil sjá allt árið í framtíðinni!“
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
