Spennandi kostur
Beint flug frá Egilsstöðum er spennandi kostur fyrir árshátíðahópa, félagasamtök, fjölskyldur og auðvitað hinn venjulega austfirska ferðalang því frá Frankfurt er hægt að fljúga nánast hvert sem er.
Millilandaflugið skiptir Austurland miklu
Þegar þýska flugfélagið Condor hefur beint flug frá Franfurt í maí opnast ýmsir möguleikar fyrir austfirska ferðaþjónustu. Díana Mjöll Sveinsóttir, framkvæmdastjóri Tanna Travel, hefur sett sig í stellingar og mun bjóða Austfirðingum upp á ferð til Þýskalands og Þjóðverjum verður boðið upp á fimm daga draumaferð um Austur- og Norðurland.
„Þetta flug hefur mikla þýðingu fyrir okkur,“ segir Díana Mjöll en hún hefur starfað við ferðaþjónustu á Austurlandi í fjöldamörg ár og man tímana tvenna. „Millilandaflug um Egilsstaði er vissulega eitthvað sem við höfum áður séð en mér finnst ég verða vör við ákveðna hugarfarsbreytingu hjá austfirskum ferðaþjónustuaðilum. Mér finnst eins og að fólki finnist að reglubundið millilandaflug um Egilsstaðaflugvöll sé raunhæfur möguleiki í framtíðinni óháð þessu tiltekna flugfélagi,“ segir hún og bætir við:
„Þetta hefur opnað augu mín og fólks sem ég er í sambandi við gagnvart því að þetta geti í raunverulega leitt til jákvæðrar þróunar í ferðaþjónustu í landshlutanum og að Austurland sé sýnilegri sem sá áfangastaður sem við þekkjum en síður svæði sem ferðamenn keyra í gegn á leið sinni eitthvert annað.“
Opnar á nýja möguleika
Þegar Díana Mjöll fékk fyrst fregnir af fyriráætlunum þýska flugfélagsins segist hún fyrst hafa hugsað um heimamanninn. „Ég byrja alltaf á því,“ segir hún brosandi. „Þannig að við settum upp ferð, hugsuð fyrir Austfirðinga, sem farin verður í maí. Þetta gerðum við raunar í mörg ár í gegnum Keflavík en hættum því svo þegar heimsfaraldurinn skall á. Beint flug frá Egilsstöðum breytir miklu fyrir Austfirðinga, sem eru vanir að fljúga til London frá Keflavík, svo ég nefni dæmi, en flug til Frankfurt opnar allt aðra möguleika og er spennandi kostur fyrir árshátíðahópa, félagasamtök, fjölskyldur og auðvitað hinn venjulega austfirska ferðalang því frá Frankfurt er hægt að fljúga nánast hvert sem er.“
Kröfuharðir ferðamenn
Díana Mjöll þekkir vel til Þjóðverja og Þýskalands. Hún hefur kynnst þeim sem ferðamönnum en hún var líka búsett í Þýskalandi um tíma. Hún segir að Austfirðingar megi búast við kröfuhörðum ferðamönnum og náttúruunnendum: „Goðsögnin er sú að þetta séu sparsamir ferðamenn en ég er ekki alveg sammála því. Þjóðverjar eru alveg tilbúnir að borga vel fyrir gæði og spennandi vörur. Við þurfum að leggja okkur fram um að bjóða upp á góða þjónustu og gott skipulag. Við þurfum að peppa okkur upp og hugsa þetta eins og góða leiksýningu. Góðir leikarar koma alltaf í réttu stuði á sviðið!
Við eigum að vanda okkur í hvívetna og þá mun þetta ganga vel. Þetta verður líka miklu skemmtilegra ef við gerum þetta almennilega,“ sagði Díana Mjöll að lokum.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
